Issue link: https://maltatoday.uberflip.com/i/1528158
15 kotba IL-ĦADD 20 TA' OTTUBRU 2024 • illum Rokna letterarja mill-Kunsill Nazzjonali tal-Ktieb Patrick Sammut jitkellem mal-ħassieb u l-kittieb Anton Sammut dwar ir-rumanz tiegħu Iż-Żifna tad-Destin (awtoppubblikat, 2023) kif ukoll l-esperjenza bħala awtopubblikatur Meta l-filosofija tiltaqa' man-narrattiva fittizja Patrick Sammut: Għaliex l-għażla li tambjenta l-azzjoni tar-rumanz tiegħek Iż-Żifna tad-Destin (awtoppubblikat, 2023) fil-Ġermanja? U kemm huwa importanti l-aspett storiku f 'dan ix- xogħol tiegħek? Kemm hu importanti li kittieb jagħmel ir-riċerka tiegħu sewwa qabel jibda jikteb rumanz bħal dan? Anton Sammut: Biex stajt nikteb x'kelli f 'moħħi f 'rumanz bħal dan kelli bilfors nambjentah fil-Ġermanja tas-seklu 20 fuq firxa ta' seklu sħiħ, li fih jinkludu wkoll l-Ewwel u t-Tieni Gwerra Dinija u allura anki l-aspett storiku, kulturali, politiku u soċjoloġiku ta' dawk is-snin, sintetizzati kif qed ngħid f 'dan il-pajjiż. Infatti, l-aspett storiku li nsibu f 'dar- rumanz ma daħħaltux biss biex noħloq sfond għan-narrazzjoni tiegħi imma wkoll biex permezz tiegħu stajt noħroġ anki temi oħrajn, fosthom dik taċ-ċikliċità tar-rikorrenza eterna, kunċett filosofiku fejn allura f 'dar-ritorn etern tal-ħajja kollox jerġa' jirrepeti ruħu mill-ġdid. Il- fatt li l-affari ma tidhirx hekk għal ħafna bnedmin huwa għaliex ħafna minna ninsabu tant assorbiti bl-egoċentriżmu tagħna li lanqas biss nindunaw li dar- ritorn ċikliku qed iseħħ kontinwament fina u fil-bqija tal-Ħolqien. Infatti dan il-fatt kien ilu magħruf anki sa minn żmien il-Greċja Klassika b'mod speċjali mill-filosfi Stojċi imma anki mill-fiżika moderna li għandna llum. Naturalment, il-qarrej mhux se joqgħod jidħol f 'kunċetti kumplessi bħal dawn huwa u jaqra l-ktieb, imma bħala bażi, dal-kunċett ċikliku jaħdem perfettament f 'nisġa ta' rumanz bħal dan li hu mifrux fuq seklu sħiħ. Għat-tieni mistoqsija tiegħek rigward kemm awtur għandu bżonn jagħmel riċerka tajba biex joħloq rumanz bħal dan hija importanti ferm. Imma bir- riċerka biss b'daqshekk ma jfissirx neċessarjament li se toħloq rumanz kif suppost. Direttur orkestrali l-ewwel ħaġa li għandu jagħmel hu li jirriċerka sew fuq is-sinfonija li jkun se jesegwixxi kif ukoll x'tip ta' mużiċisti għandu bżonn, imma mbagħad trid tkun l-abbiltà personali tiegħu biex jesegwixxi s-sinfonija b'tempo preċiż u armonjuż kif għandha tkun. Inti wieħed mill-awturi Maltin li tippubblika l-kotba tiegħek stess. U dan ilek tagħmlu snin twal kemm f 'rabta mal-kotba ta' narrattiva fittizja, kif ukoll mal-kotba ta' riċerka. Huwa l-filosfu u l-artist li hemm ġo fija li ddettawli biex nippubblika l-kotba tiegħi stess. Ħa nispjega ruħi xi ftit aħjar. Bħala artist li npitter b'diversi stili kont sa minn tfuliti nesprimi ruħi b'dan il- mod liberalment, u daqstant ieħor bħala ħassieb. Imma jekk minn naħa huma ħafna dawk li jafu x'inhu r-rwol ta' pittur, fil-verità huma ftit dawk li jafu eżatt kif jaħdem moħħ ta' filosfu jew ħassieb. Pereżempju, hawn Malta u mhux f 'Malta biss eżistew ħafna 'ħassieba' jew 'filosfi' magħrufin, imma jekk tali 'filosfu' jkun ikkontaminat b'xi ideoloġija jew reliġjon allura dan ma jkun filosfu xejn, iżda jkun jew demagogu politiku li bir-retorika tiegħu jkun qed ikompli jippromovi l-ideoloġija li jkun qed iħaddan hu stess, jew inkella jkun pjuttost teologu jekk il- kredu tiegħu jinzerta jkun xi forma ta' reliġjon. Iċċarajt dal-punt ngħid ukoll li sa minn tfuliti kien diġà beda jidher fija li kien se jkolli karattru sod u determinat u minħabba f 'hekk qatt ma ħallejt lil xi ħadd jinfluwenzani bl-imbarazz li dat- talin kienu wirtu minn ta' qabilhom u minn ta' qabilhom u minn ta' qabilhom ad infinitum imma ridt li l-verità jew il- veritajiet niskoprihom b'moħħ li Alla tani biex nużah kif suppost. Kbirt, studjajt forom varji ta' psikoloġiji u filosofiji ta' kwalunkwe tip, sew dawk tal-Punent kif ukoll tal-Orjent, u hemm komplejt mhux biss niftaħ moħħi iżda dawn l-istudji kkonfermawli saħansitra dak li kont naħsbu sa minn meta kont kważi għadni tfal. Imbagħad ġew studji u esperjenzi spiritwali oħrajn, sakemm fl-aħħar kelli stampa ċara biżżejjed li permezz tagħha stajt nikteb il-kotba tiegħi stess. Meta mbagħad ġejt biex niktibhom kont diġà konvint li l-kotba tiegħi nippubblikahom jien stess u waħda mir-raġunijiet kienet li ma ridt l-ebda pubblikatur jiddettali x'għandi u x'm'għandix ngħid fil- kotba tiegħi, anki għax kieku ppruvajt nispjegalhom x'kelli f 'moħħi ma kienu se jifhmuni qatt. Kif tiddeskriviha din l-esperjenza tiegħek bħala awtopubblikatur? X'inhuma l-punti pożittivi u dawk negattivi ta' għażla bħal din? Rigward x'punti pożittivi u negattivi hemm għal min jippubblika l-kotba tiegħu ma nistax ngħidlek eżatt għaliex fejn jidħlu l-kotba tiegħi esperjenzajt pjuttost il-pożittiv biss, fosthom li l-ewwel u qabel kollox għandek is-sodisfazzjon li l-ktieb tiegħek ippubblikajtu inti stess, li ma ndaħallek ħadd x'għandek tikteb jew ma tiktibx, u forsi l-aktar ħaġa importanti hija li d-drittijiet tal-ktieb ikunu kollha f 'idejk, sid tal-kotba tiegħek bħalma suppost għandek tkun sid ta' moħħ li Alla pprovdielek biex tħaddmu sew. Temmen li xogħlijiet ippubblikati minn djar magħrufa tal-pubblikazzjoni huma ta' livell ogħla minn dawn awtoppubblikati? Dan jiddependi x'ħiliet artistiċi u tekniċi jkollu l-awtur f 'idejh. Pereżempju jien, li apparti suġġetti oħrajn gradwat ukoll fl-arti u fid-draftsmanship arkitettoniku, kelli l-vantaġġ li nfassal il- layout tal-kotba tiegħi sal-inqas dettall: mill-mod kif għandu jitqassam minn ġewwa, skrutinju ortografiku metikoluż, sad-disinn tal-qoxra tal-ktieb stess. Min- naħa l-oħra mhu minnu xejn li xogħlijiet ippubblikati minn djar magħrufa tal- pubblikazzjoni huma neċessarjament aħjar minnn dawk awtoppubblikati; infatti, iltqajt ma' diversi kotba lokali u barranin li ġew ippubblikati minn djar tal-kotba stabbiliti u fihom sibt żbalji kbar: minn dawk ortografiċi sa problematiċi tekniċi oħrajn. L-importanti huwa li jekk awtur se jippubblika l-kotba tiegħu għandu jkun jaf eżattament x'qed jagħmel fuq tali proġett u barra minn hekk għandu jkun ferm dixxiplinat waqt dal-proċess. L-awtur Anton Sammut bagħatli kopja tal-ktieb biex nintervistah b'mod onest.