Issue link: https://maltatoday.uberflip.com/i/734028
Aħbarijiet 5 Il-Ħadd 2 ta' Ottubru 2016 | illum Qed inqatta' wisq ħin fuq Facebook... minn Albert Gauci Cunningham ILLUM il-ġurnata, l-użu ta' Facebook u tal-midja soċjali saret bħall- ħobż u l-ilma ta' kull ġenerazzjoni, imma l-aktar ta' dik żagħżugħa u dik ta' mezz'età. Stħarriġ li sar mill-ESPAD (European School Survey Project on Alcohol and other Drugs) juri kif medja ta' 87% ta' dawk li ħadu sehem u li fil-maġġor parti tagħhom huma bejn 15 u 16-il sena użaw l-internet matul dawn l-aħħar sebat ijiem. B'kollox, skont l-istudju bbażat fuq l-2015, 71.4% taż-żgħażagħ f 'din l-età użaw xi forma jew oħra ta' midja jew siti soċjali li fosthom, Facebook jibqa' l-aktar popolari. It-tfajliet jidher li jużaw is-siti soċjali ħafna iktar, fil-fatt, filwaqt li 23.6% ta' dawk is-subien li pparteċipaw qalu li jużaw il-midja soċjali għal madwar sitt sigħat jew iktar, dan il-persentaġġ jitla' għal 33.3% fost il-bniet. Dan ifisser li persentaġġ pjuttost konsiderevoli ta' persuni fl-ewwel snin taż-żgħożija qed iqattgħu madwar nofs il-ġurnata jużaw il-midja soċjali. Interessanti iżda, li minkejja l-prevalenza qawwija tal-użu tal-midja soċjali, 56.6% ta' dawk li pparteċipaw fl-istħarriġ jaqblu li qed 'iqattgħu wisq ħin fuq il-midja soċjali'. Fost it-tfajliet din 'l-iskuntentizza' hija ogħla, b'66% jgħidu li qed iqattgħu wisq ħin jużaw il- midja soċjali. Interessanti, jekk mhux inkwetanti wkoll, huwa kif minoranza sostanzjali ta' 39% iħossu li l-burdata tagħhom tinbidel għan-negattiv jekk ma jkunux jistgħu jużaw il- midja soċjali, għal darb'oħra bil-bniet jirreġistraw persentaġġ ogħla ta' 'burdata ħażina' fin-nuqqas ta' siti u midja soċjali. Jafu li qed isiru dipendenti fuq ħajja virtwali L-ILLUM għamlet kuntatt ma' Louisa Houlton, Psikologu tat-Tfal u staqsietha kif tispjega l-fatt li minkejja l-użu mifrux tal-midja soċjali, iktar min-nofs dawk mistħarrġa jħossu li qed jużawh wisq. "Għax qed jindunaw li din dipendenza, bħalma hemm dipendenzi oħrajn," tibda twieġeb Houlton. "U bħalma jiġri f 'każ ta' dipendenzi oħrajn, ċerti nies ikunu in denial, jafu li saru dipendenti, jammettu li saru dipendenti, imma jibqgħu dipendenti, anke jekk jafu li qed tikkontrollahom." L-ILLUM tistaqsi lil Houlton biex tispjega aħjar xi tfisser meta tgħid li l-midja soċjali tista' qed tikkontrollahom. "Għax tieħu kontroll ta' ħajjithom, fejn dak li jkun," tkompli tgħid il-psikologu, "iktar ikun moħħu fuq dak li qed jiġri fuq sit soċjali bħal Facebook milli x'qed jiġri fil- ħajja reali." Tkompli tispjega kif għal bosta, l-ħajja tibda tiffoka fuq il-virtwali iktar milli fuq ir-reali. Imma d-dipendenza fuq il-midja soċjali hija simili għal dipendenzi oħrajn, bħall-alkoħol u d-droga li l-istess stħarriġ tal-ESPAD jitkellem dwarhom? "Le, mhux eżattament," tibda twieġeb Houlton, "fis-sens li fir-rigward ta' vizzji bħal xorb u droga l-effetti huma l-aktar fiżiċi, imma fil-każ tal-midja soċjali huma aktar psikoloġiċi." F'dan il-punt, il-psikologu Houlton mal- ILLUM telenka diversi fatturi biex tispjega dan; "l-istima tiegħek innifsek tkun tiddependi dejjem aktar fuq kemm se taqla 'likes' u 'kummenti pożittivi'. Anke fir-relazzjonijiet," tkompli tispjega, "kważi, kważi, jsir aktar importanti x'qalu n-nies dwar ir-relazzjoni tiegħek u kemm ir-relazzjoni tiegħek qed tingħata approvazzjoni, milli l-ħin li tqatta' mal-istess sieħeb/sieħba." Bżonn ta' edukazzjoni u kuxjenza Il-psikologu Houlton tgħid li għalkemm l-avvanz u l-progress kbir li ġabet magħha l-midja soċjali la tista' u lanqas għandha titreġġa' lura, "hemm bżonn li jkun hemm edukazzjoni u kuxjenza." Tgħid li għandna bżonn nifhmu li "l-ħajja għandha tibqa' waħda profonda, għax ħajja li tiddependi fuq il-virtwal tibqa' waħda superfiċjali." Intant, ir-rapport tal- ESPAD juri wkoll kif 48% taż-żgħażagħ f 'din l-età (15-16) qatt ma jaqraw ktieb jew jaqraw ktieb ftit drabi matul is-sena. Jiżvela wkoll kif 30% jilagħbu logħob fuq il-kompjuter kuljum u fuq nota pożittiva 65% jagħmlu xi forma ta' attività fiżika kuljum jew tal-anqas darba fil-ġimgħa. 57% taż-żgħażagħ jammettu li qed iqattgħu wisq ħin jużaw Facebook imma 39% jgħidu li mingħajru tinbidlilhom il-burdata Id-defiċit jonqos bin-nofs FL-EWWEL tmien xhur tas- sena, id-defiċit naqas bin-nofs, minn €141 miljun fl-istess perjodu s-sena l-oħra għal €79 miljun, din is-sena. Dan filwaqt li n-nefqa tal-Gvern żdiedet b'€38 miljun jew 1.6% aktar mill-istess perjodu fl- 2015. Anke d-dħul tal-Gvern żdied b'€100 miljun jew 4.5% meta mqabbel mal-istess perjodu ta' żmien is-sena l-oħra. Dawn iċ-ċifri kienu ppublikati mill-Uffiċċju Nazzjonali tal- Istatistika. Kull sena jkunu rappurtati 1,000 każ ta' vjolenza domestika FID-DAWL tal-aħħar omiċidju li ħalla omm ta' 41 sena mejta (ara paġna 10), liema każ jista jkun każ ieħor ta' vjolenza domestika, jirriżulta li f 'pajjiżna b'kollox isiru madwar 1,000 rapport fis-sena lill-Pulizija u li jitrattaw agressjonijiet simili. Dawn iċ-ċifri, li joħorġu minn riċerka li saret mill-Professur u Kap tad-Dipartiement tal-Kriminoloġija Saviour Formosa, kienu diskussi f 'laqgħa bejn id-Dekan tal-Fakultà għall-Ħarsien Soċjali Andrew Azzopardi u l-Victim Support Malta. L-għan tal-laqgħa kien biex ikun skoperti modi differenti ta' kif iż-żewġ naħat jikkolaboraw bejniethom biex jiżviluppaw proġetti ta' riċerka bl-għan ewlieni li jinħolqu politiki ġodda kontra l-kriminalità. Il-Fakultà mmexxija minn Azzopardi tħoss li huwa importanti li l-Istat jkun dejjem kommess u jagħti appoġġ lill-vittmi ta' kriminalità, inkluż ta' vittmi ta' vjolenza domestika. 1,000 każ rappurtat ta' vjolenza domestika kull sena