Issue link: https://maltatoday.uberflip.com/i/736803
I x-xahar li għadda Silvio Berlusconi għalaq tmenin sena. It-tycoon tal-media ħoloq notorjetà kbira dwaru nnifsu, l-aktar il-każ tal- "bunga bunga", fejn allegatament kien jikri tfajliet taħt l-età għad- divertiment. Hu magħruf ukoll bħala l-kontrullur tal-Mediaset u tal-klabb tal-futbol AC Milan, li spiċċa f 'idejh fl-1986 u li issa biegħ lill-konsorzju Ċiniż. Dan il-klabb għandu eluf ta' segwaċi akkaniti anki f 'Malta, li jmorru jaraw lit-tim jilgħab fl-Italja. Hu magħruf bħala 'il cavaliere', titlu li ngħatalu għall- Ordni ta' Mertu. Skont ir-rivista Forbes, Berlusconi hu llistjat b'fortuna ta' $7.1 biljun u t-tnax –il persuna l-aktar potenti fid-dinja. Dam għal disa' snin iservi bħala Prim Ministru Taljan b'tendenzi politiċi jxaqilbu mis- Soċjaliżmu sad-Demokrazija Kristjana. Dam kap tal-partit tiegħu tal-lemin Forza Italia mill-1994 sal-2009. Fl-2003 pprova jerġa' jġib fuq saqajh dak il-partit. Fl-istampa Ingliża, Berlusconi kien attakkat ta' spiss f 'The Economist li kien jisħaq li l-PM Taljan kellu bosta kunflitti ta' interessi. Berlusconi twieled f 'Milan u kien miżżewweġ lil Carla Dall'Oglio (1965-1985) u Veronica Lario (1990- 2010). Dakinhar li Berlusconi għalaq 80 sena, il-ġurnal La Repubblica offra servizz esklussiv lill-qarrejja tiegħu, iffirmat minn Eugenio Scalfari, fundatur ta' La Repubblica li kiteb dwar ir-rapport personali bejnu l-eks Prim Ministru Taljan. Jiddeskrivih bħala imprenditur li ried jagħti gost "jisseduċi u jikkmanda, anki bil-favuri mal- ħbieb fejn meħtieġ." Kien jixtieq ukoll li jkun ammirat. Berlusconi, skont Scalfari, kien joffri l-ħbiberija u jekk hemm bżonn anki l-flus u l-poter. Scalfari jiftakar li t-TV Mondadori kienet sejra ħażin u riedet tbigħ. L-uniku akkwirent possibbli kien appuntu Berlusconi. Kellu żewġ palazzi tassew impressjonanti, b'ġonna kbar li f 'nofshom kien hemm saħansitra il-qabar tal-familja bil-lest. Silvio kien anki joffri lill-ħbieb intimi biex jindifnu f 'dak il-musulew. Waħda mis-swali kbar kienet armata bħala ġinnasju. Imma Silvio ma kienx interessat li jipprattika l-isport. "Il-prattika ma tirrendilek xejn. Aħjar tinvesti billi tixtri tim prestiġġjuż u qawwi. - Liema? - L-Inter jew il-Milan." Fil-villa Berlusconi kellu anki s-sala tal-mużika, armata bil-pjanu li fuqu kien idoqq Toscanini. Fiż-żgħożija tiegħu Berlusconi kien ikanta fuq il-vapuri tat-turisti (Milord, Parlami d'amore Mariù, fost oħrajn). Berlusconi ffesteġġja t-tmenin sena tiegħu mal-familja f 'Ancone. Għadhom ifittxuh it-tfajliet biex jieħdu xi stessu miegħu. It-trabi u l-batteriji diġitali L-awtoritajiet tas-saħħa fl- Ingilterra qed jibagħtu messaġġ urġenti lill-ġenituri biex joqogħdu attenti għal uliedhom żgħar li qed ibagħbsu ma' batteriji bħal dawk li jsibu f 'kartolini jdoqqu, ġugarelli u affarijiet oħrajn bil-periklu li jiblgħuhom. Fi sptarijiet maġġuri Ingliżi, qed jiġri li tfal żgħar qed juru li jiblgħu medja ta' batterija kull xahar. Dawn il-batteriji jeħlu fl-esofagu u jistgħu jaħarqu toqba li tikkomprometti s-saħħa diġestiva tat-tarbija, possibilment bil-bżonn ta' operazzjonijiet kumplessi. Dan hu effett ieħor tat-teknoloġija diġitali, qed iwissu t-tobba, u l-ġenituri għandhom responsabbilità kbira lejn is-sigurtà ta' wliedhom. M'għandniex ċifri dwar inċidenti bħal dawn f 'Malta. Iż-żmien tal-iżvalutazzjoni Mid-diversi rivisti li nirċievi regolarment, ftit taż-żmien ilu laqatni l-editorjal li Patri Philip Cutajar OFM Cap kiteb għar-rivista Dawl Franġiskan. Dawn ir-rivisti, li sa ftit ilu kienu joħorġu għal settur ristrett ħafna tas-soċjetà, issa qed jidhru li qed jilqgħu l-isfida taż-żmien. Anki fil-preżentazzjoni għamlu qabża kbira fil-kwalità. Minbarra r-rivista tal-Franġiskani għandi f 'moħħi wkoll dik tal- Karmelitani, dik tas-Sależjani u l-oħra li joħroġ kull xahar il-Kunsill tal-Kappillani (Flimkien). Din hi midja li qed timla vojt u hi ħasra li ma tingħatax aktar attenzjoni fuq il-mezzi tax-xandir. Hi midja li mhix tiddejjaq tanalizza, filosofikament u soċjoloġikament, aspetti kruċjali tal-komunità, anki politiċi. Dak li jikkomunikaw dawn ir-rivisti mhux kondexxenti u jxaqilbu lejn l-interess nazzjonali veru. Intant, biex nerġa' lura għall- editorjal li rreferejt għalih fil- bidu, Patri Cutajar jistaqsi, f 'titlu provokattiv, jekk aħniex qed ngħixu fi żmien ta' żvalutazzjoni. Jibda billi jfakkar li l-kelma żvalutazzjoni normalment tintuża fil-qasam bankarju jew finanzjarju. Nitkellmu dwar l-żvalutazzjoni tal-munita meta pajjiż ikun dahru mal-ħajt. Iżda mbagħad l-editorjal japplika l-kelma "żvalutazzjoni" għal sferi oħra, bħal dawk konnessi mal- morali, l-ambjent u saħansitra l-lingwa. F'dan il-qasam partikolari, Patri Cutajar iqis il-korruzzjoni lingwistika u jagħmel din ir- riflessjoni: "Għalkemm suppost li hemm min hu għassa biex il-Malti jkun miktub u moqri tajjeb fil-mezzi tax-xandir, teżisti taħwida sħiħa." U dan jindika kemm il-qofol kulturali, il-bażi li hi determinanti għall- identità Semitika-Ewropea ta' Malta hu kompromess. Lanqas il-Gvern ma jimpurtah mit-taħwid lingwistiku għax kieku l-Awtorità tax-Xandir ma tippermettix l-aberazzjonijiet li jixxandru, l-aktar fejn jidħlu r-reklami, il-programmi pubbliċitarji (telebejgħ eċċ) u dawk sportivi. Is-sitwazzjoni li qed jirreferi għaliha l-editorjal ta' Dawl Franġiskan turi kemm Malta għandha kriżi ta' valuri u għadha ma sabitx ruħha. Għaddejja minn żmien ta' taqlib li għadha ma tafx kif tvinġi: mill-morali għall-ambjent, mill-ispekulazzjoni tal-art sal- iskandli politiċi, mill-iżvalutazzjoni morali sal-manifestazzjoni ta' reliġjon tal-istatwi u s-santi, Malta Indipendenti, Repubblikana u Ewropea għadha m'għarfitx min hi. Forsi qed naħsdu l-konsegwenzi tad-dominju li tajna lill-mexxejja politiċi u reliġjużi. illum | Il-Ħadd 9 ta' Ottubru 2016 20 Opinjoni It-tmenin sena tat-'tycoon' tal-'media' MARIO AZZOPARDI "Malta għandha kriżi ta' valuri u għadha ma sabitx ruħha. Għaddejja minn żmien ta' taqlib li għadha ma tafx kif tvinġi" Silvio Berlusconi