Issue link: https://maltatoday.uberflip.com/i/863490
illum | Il-Ħadd 20 ta' Awwissu 2017 20 Mediaspot X i ħamsin kilometru 'l barra minn Krakovja, fin-naħa ta' isfel tal-Polonja, hemm lokal b'popolazzjoni ta' xi erbgħin elf ruħ kollox, jismu Oswiecim. Belt żgħira li għandha storja mqallba ħafna u li, sfortunatament, minkejja d-diversi avvenimenti sbieħ f 'dan il-lokal, fosthom is-suċċessi sportivi partikolarment fil-hockey tas-silġ, Oswiecim hija magħrufa l-aktar għall- fatt li hemmhekk ittella' l-akbar kamp tal-konċentrament fit-Tieni Gwerra Dinjija, magħruf bl-isem Ġermaniku Auschwitz. Kuljum preċett, minn xi s-sitta u nofs ta' filgħodu, jitfaċċa serp twil ta' nies jistennew il-kamp u l-mużew tiegħu jiftħu għall-ħabta tas-sebgħa u nofs ta' filgħodu. Eluf ta' nies iżuru l-post kuljum, sajf u xitwa. Nies ta' kull età, ta' nazzjonalitajiet differenti, jiddeċiedu li jżuru dan il-post fejn seħħew tant atti ta' terrur, fosthom l-iggassjar ta' eluf ta' Lhud, Pollakki, Rom, omosesswali, komunisti, xhieda ta' Ġeħova, qassisin Kattoliċi, intellettwali, artisti, nies bi bżonnijiet speċjali u oħrajn li kienu meqjusin bħala 'devjanti' jew 'deġenerati'. M'iniex se niddiskuti l-kontroversja li daħlu fiha storiċi leminin li saħqu li Auschwitz huwa mit ippropagat mix-xellug u minn dawk il-gruppi li jqisu rwieħhom vittmi. Sal-lum għadni ma nistax nifhem kif xi ħadd jista' jinnega li seħħ dan kollu. Imma b'kumbinazzjoni, waqt li l-ġimgħa l-oħra kont qiegħed nerġa' nżur dan il-post, proprju fl-14 ta' Awwissu, l-anniversarju tal-mewt ta' San Massimiljanu Kolbe (il-Franġiskan li talab biex jinqatel huwa minflok Pollakk ieħor) qrajt l-aħbarijiet ta' dak li seħħ jumejn qabel f 'Charlottesville, fl-Istati Uniti. Id-dimostrazzjoni "Unite the Right", imsejħa minn diversi gruppi faxxisti u neonazisti fl-Istati Uniti, li jemmnu bis-sħiħ fis-supremazija tar-razza l-bajda, spiċċat b'atti vjolenti u saħansitra mwiet. Fil-lejla ta' qabel id-dimostrazzjoni, grupp ta' faxxisti ħarġu fit-toroq bit-torċi f 'idejhom biex jibdew jintimidaw il- popolazzjoni f 'Charlottesville, l-aktar lil dawk ta' dixxendenza Lhudija, nies suwed, u oħrajn li għalkemm bojod jissimpatizzaw ma' dawn il-gruppi. Waqt id-dimostrazzjoni "Unite the Right", minbarra l-bandiera tal- Konfederati, dehret ukoll il-bandiera tas-suprematisti bojod u anki dik bl-iswastika nazista. Tul iż-żewġ dimostrazzjonijiet, dawn il-faxxisti kantaw slowgans razzisti kontra l-Lhud u kontra s-suwed, li kellhom messaġġ ovvju ħafna: ħadd ma jista' jħossu ugwali għall-bojod. L-avvenimenti mdemmija u intimidatorji f 'Charlottesville ma jistgħux ma jfakkrux fit-tattiċi tal- iSturmabteilung, jew kif inhuma magħrufa aħjar, il-brownshirts: l-iskwadristi nazisti li xogħolhom kien li jintimidaw lill-'għedewwa' u jipprovokaw u jwettqu atti vjolenti fuq dawk 'tan-naħa l-oħra'. Mhux ta' b'xejn li f 'Charlottesville dehret l-iswastika, għax l-istess ħsieb nazista qiegħed jiġi ppropagat minn dawn il-leminin Amerikani li donnhom insew il-fatt ovvju li pajjiżhom stess kien parti mill- gwerra kontra l-iswastika. Tant mibegħda! Fid-daħla lejn Auschwitz, ftit passi lil hinn mill-kanċell bil-famuża gidba nazista "Arbeit Macht Frei" hemm ħanut li jbigħ il-kotba u souvenirs tal-kamp. Ftit diffiċli tifhem kif post bħal dan ibigħ il-postcards b'ritratti tal-binjiet u tal-kanċell. Ftit 'il barra minn Birkenau, it-tieni kamp f 'Osviecim, hemm ħanut ieħor li jbigħ il-kobta u s-souveniers, fosthom kalamiti għal mal-friġġ b'sentenza qasira ħafna miktuba fuqhom: "Qatt Iżjed". Din il-qatt iżjed tinstema' kull darba li nieħdu nifs u nqaħqħu l-aħħar duħħan tal-porvli mill-pulmun. Imma mbagħad, kif dejjem jiġri, ninsewha u nerġgħu għall-istess storja ta' qabel, jew, aħjar, għall-istess storja ta' dejjem. Ebda mument tal-istorja, ikrah kemm kien ikrah, ma rnexxielu jgħallem lill-umanità lezzjoni iebsa biżżejjed biex ma tirrepetix il-waħx li tkun wettqet. Wieħed irid jiftakar, pereżempju, li kemm f 'Auschwitz u kemm f 'Birkenau, inżammu priġunieri tal-gwerra wara li ġew illiberati mill- Armata l-Ħamra. Anki l-prassi ta' kamp ta' konċentrament ma mititx ma' tmiem it-Tieni Gwerra Dinjija. Ħalli ma ninsewx, pereżempju, il-kamp tal- konċentrament f 'Omarska, fil-Bożnja u Ħerżegovina, li fl-1992, ħamsin sena wara Auschwitz, kien il-post fejn inżammu, f 'kundizzjonijiet terribbli, mijiet ta' Musulmani Bożnijaċi u Kroati. Jingħad li f 'Omarska mijiet mietu bil-ġuħ, bis-swat u b'maltrattament. Dawk li ma mitux, sofrew vjolenza fiżika (swat, stupru u tortura) u anki psikoloġika. Omarska ma kienx l-uniku kamp tal-konċentrament fil-kunflitt fl- ex-Jugoslavja. Kien hemm oħrajn, fosthom Manjaca, Trnopolje u Keraterm. Mhux biss it-terrur li seħħ ġo fihom li kien jixbah perfettament l-istorja ta' Auschwitz u l-kampijiet tal-konċentrament nazisti, imma anki x'ġara wara: sensiela ta' 'rapporti' u 'studji storiċi' li l-għan tagħhom kien li jinnegaw dak li ġara. Il-punt hu li Auschwitz għadu ħaj mhux biss bħala mużew li jżuruh mijiet ta' nies kuljum preċett, lanqas m'għadu ħaj biss bħala memorja. Auschwitz għadu ħaj f 'dak li ġara warajh, f 'dak li ġara deċenni wara dak li ġara fih. Auschwitz għadu ħaj f 'dak li ġara f 'Charlottesville u għadu ħaj f 'dak li jiġri wara ħitan "ta' sigurtà" li jagħlqu popli sħaħ, jagħsruhom dejjem aktar billi jnaqqrulhom (jew jaħtfulhom) l-art. Auschwitz jibqa' ħaj kull fejn u kull darba xi ħadd jemmen li hemm razza superjuri fuq oħra, kulur tal-ġilda pur u ieħor maħmuġ. Auschwitz jibqa' ħaj kull darba xi ħadd jinżel fit-toroq, bil-bnadar u bit-torċi u bil-ponnijiet (anki jekk moħbija fil-bwiet tal-qalziet) jgħajjat li t-tali u t-talija għandhom jitilqu 'l hemm għax hawn mhux tagħhom. U m'hemmx għalfejn tmur il- Polonja, jew il-Bożnja Ħerżegovina jew Charlottesville biex tisma' l-ħanġra kontra "il-barrani", hux veru? Auschwitz għadu ħaj f 'dak li ġara warajh, f 'dak li ġara deċenni wara dak li ġara fih. Oswiecim - Charlottesville IMMANUEL MIFSUD Neymar: Trasferiment ta' 222 miljun ewro