Issue link: https://maltatoday.uberflip.com/i/1536967
opinjoni illum • IL-ĦADD 29 TA' ĠUNJU 2025 09 "Il-prevenzjoni trid tkun ħafna anqas burokratika, ħafna anqas frammentata, u ħafna iżjed robusta ... fin- nuqqas ta' dan, it-traġedja li jmiss mhix kwistjoni ta' jekk, imma ta' meta." Kelliem tal-Oppożizzjoni għall-Ippjanar, il-Kostruzzjoni u l-Artijiet, membru tal-Bord tal-Artijiet f' isem l-Oppożizzjoni, kif ukoll inġinier STANLEY ZAMMIT " ... hija wake-up call li trid tittieħed azzjoni dwarha. Importanti li wara kull każ bħal dak, l-azzjoni tittieħed." Hekk stqarret il-Ministru Miriam Dalli it ġranet wara t-traġedja li fiha tilef ħajtu ż-żagħżugħ Jean Paul Sofia. Wara meta? Għaddew sentejn u nofs minn dik it-traġedja. Qabilha, kellna numru ta' każijiet fosthom it-traġedja ta' Miriam Pace li ndifnet f 'darha wara ġranet ta' ansjetà minħabba dak li kien qed jiġri biswithom. Warajha, il-każijiet ma waqfux fosthom ħaddiem li tilef ħajtu f 'Tas-Sliema. Ftit tal-ġranet ilu blokka appartamenti kkollassat f 'Paceville. Li ma kienx għad-deċiżjoni għaqlija u f 'waqtha ta' żewġ periti seta' jkollna storja oħra tal-waħx. It-tiġrif tal-binja fil-qalba ta' Paceville mhu xejn ħlief twissija oħra dwar is-sitwazzjoni f 'dan il-qasam. Jidher li għadna ma tgħallimniex mill-iżbalji tal- imgħoddi. Il-fatt li ma miet ħadd f 'dan il- każ m'għandux ikun skuża biex ma nagħmlu xejn. Persuni sebħu bla dar, u oħrajn bin-negozji fil-madwar tilfu l-post minn fejn jaqilgħu l-għejxien tagħhom. X'azzjoni? Dak li l-Ministru Dalli sejħet bħala wake-up calls li l-Gvern Laburista kellu sa issa, anke jekk uħud minnhom ħallew vittmi, ma kinux biżżejjed sabiex tittieħed azzjoni effettiva biex tiġi salvagwardjata l-ħajja u saħħet in-nies. Is-sistemi ddisinjati mill-Gvern u mħaddma mill- Awtoritajiet fallew u qed ifallu lin-nies kuljum. Il-Gvern Laburista vvota kontra l-mozzjoni tal-Oppożizzjoni u kontra l-karba ta' omm u missier Jean Paul Sofia. Li ma kienx għall- insistenza tal-Partit Nazzjonalista u l-perseveranza tal-ġenituri tal-vittma, l-inkjesta pubblika ma kinitx issir. Il-Gvern kien jibqa' jaħbi. Aħna konna nibqgħu fl- għama tas-sitwazzjoni diżastruża fis-settur tal-kostruzzjoni. L-inkjesta pubblika dwar x'wassal għat-traġedja ta' Jean Paul Sofia għarfet illi "l-problema mhux li tikteb il-liġijiet" u insistiet għal "rieda politika li tissarraf fl-infurzar tal-liġijiet". Ir-rapport tal-inkjesta, li l-Partit Nazzjonalista aċċetta mingħajr tlaqliq, jenfasizza l-funzjoni preventiva li toħroġ mil-liġi li tobbliga lill-Gvern u lill-Awtoritajiet li jipproteġu liċ- ċittadini aktar milli jikkastigaw lill-ħatja jew li joqogħdu jitħassru lill-vittmi. Il-Gvern Laburista għadu qed ifalli f 'dan l-aspett tant ewlieni. Wara l-ħafna traġedji li seħħew u minkejja r-rakkomandazzjonijiet li saru fl-Inkjesta Sofia, jidher li għadna lura immens milli jkollna s-serħan tal-moħħ li wieħed bi dritt jippretendi. Azzjonijiet nofs kedda u tkaxkir tas-saqajn Il-Gvern Laburista jenħtieġ illi jinża' s-suppervja u mhux biss jimplimenta r-rakkomandazzjonijiet kollha tal-inkjesta Sofia mingħajr aktar tkaxkir tas-saqajn, imma wkoll juri rieda sħiħa b'azzjonijiet konkreti sabiex din l-industrija timmodernizza ruħha b'mod sħiħ u tgħolli l-istandards. Il-liċenzjar tal-kuntratturi, proċess li beda wisq tard, huwa neċessità. Minkejja dan, mhux biss mhux qed isir il-liċenzjar tal-kuntratturi kollha involuti fil-kostruzzjoni, imma wkoll is-sistema għadha nieqsa mill- infrastruttura neċessarja, mill- klassifikazzjoni skont il-qies u l-ħiliet u għadha nieqsa minn sistema robusta ta' assigurazzjoni, fejn wara li l-Gvern mera lill- Oppożizzjoni, daħħal xi obbligi iżda għadu jittituba għal sistema komprensiva. Il-linja telefonika 138 kienet inizjattiva tajba. Biss, hawn ukoll mhux l-oqsma kollha relatati mal- bini u l-kostruzzjoni huma inklużi u hija nieqsa mir-riżorsi. Ir-reviżjoni tal-liġi dwar is-saħħa u s-sigurtà wkoll saret bil-għaġla u nofs kedda. Biżżejjed wieħed isemmi illi l-unika opportunità illi dawk ikkonċernati kellhom biex jiddiskutu t-tibdiliet kien fil-Kumitat Parlamentari għall- Abbozzi tal-Liġijiet, fl-istadju ta' qabel tal-aħħar tal-liġi. Terġa' u tgħid, l-avviż legali li jirrifletti l-istess tibdiliet fil-qasam tal- kostruzzjoni ġie ppubblikat għaxar xhur wara u wkoll kien nofs sajran. Sadattant, il-professjonisti f 'dan il-qasam għadhom mhux rikonoxxuti. Kien biss it tal-ġimgħat ilu li l-Gvern ħabbar illi tliet snin oħra jaf ikollna l-istandards dwar kif isiru x-xogħlijiet u dawk dwar il- kwalità fil-bini u l-kostruzzjoni. Il-prevenzjoni hija ħafna aħjar mill-kura Waqt li l-Prim Ministru jidher li huwa kuntent illi l-liġi hija b'saħħitha biżżejjed biss biex iżżomm responsabbli lil dawk li jkunu naqsu, u allura l-enfasi tkun fuq wara li jsiru l-aċċidenti, fuq il- kura, il-Partit Nazzjonalista jinsisti fuq il-prevenzjoni u fuq sistemi robusti u integrati biex jiġu evitati l-inċidenti. Il-Partit Nazzjonalista jenfasizza li, l-awtoritajiet, minflok jintilfu fi sforzi li jwasslu għal imkien u burokrazija żejda li jwasslu biss għal ħela ta' ħin u spejjeż żejda, għandhom jibnu bis-serjetà lilhom infushom bir-riżorsi, l-għarfien, il-kompetenzi u l-attitudnijiet neċessarji biex isaħħu l-prevenzjoni sabiex is-siti tal-kostruzzjoni ma jibqgħux ikunu l-altar tas- sagrifiċċju frott in-nuqqas ta' rieda politika u l-inkompetenza ta' min qed imexxi. Irridu naraw l-implimentar b'effiċjenza u effettività ta' sistemi, fosthom tal-iskills card, li jinkludu t-taħriġ u l-edukazzjoni neċessarja. F'pajjiżi serji jeżisti uffiċċju nazzjonali ġeoloġiku li jassisti fl- ippjanar, fil-bini u l-kostruzzjoni u fil-protezzjoni ambjentali. F'Malta, għad m'għandniex tali entità u anke jekk xi funzjonijiet huma mifruxa fuq diversi entitajiet oħra, dan huwa mingħajr kordinazzjoni u mingħajr monitoraġġ. Waqt li nimu illi bħalissa għaddejjin l-investigazzjonijiet u l-inkjesti mill-awtoritajiet, nistennew illi dak kollu li joħroġ mill-investigazzjonijiet ikun ippubblikat u kkomunikat. L-awtoritajiet għandhom jaċċertaw li jisiltu t-tagħlimiet kollha minn dan l-aċċident, fosthom dwar is-serjetà li biha jiġu assessjati l-method statements u l-condition reports, kif ukoll l-immedjatezza tar-rispons u l-ipproċessar tar- rapporti. Dan għandu jservi biex isiru l-aġġornamenti meħtieġa fil-kostruzzjoni u dawk kollha kkonċernati jtejbu l-ħiliet u l-kompetenzi tagħhom. Il-prevenzjoni trid tkun ħafna anqas burokratika, ħafna anqas frammentata, u ħafna iżjed robusta, effettiva u effiċjenti, permezz ta' sistemi integrati, monitoraġġ kontinwu u proċessar spedit tar- rapporti, permezz ta' investimenti adekwati fit-teknoloġija u fir-riżorsi umani. Fin-nuqqas ta' dan, it-traġedja li jmiss mhux kwistjoni ta' jekk, imma ta' meta. Ma nistgħux nibqgħu niddependu mill-fortuna. Il-wake- up call li jmiss taf tkun tard wisq. Wake-up call oħra ... meta se jqum il-Gvern? Il-bini li ġġarraf Paceville, minn fejn kellhom jiġu evakwati 32 persuna