Issue link: https://maltatoday.uberflip.com/i/392872
10 illum | Il-Ħadd 05 ta' Ottubru 2014 www.gourmettoday.recipes Malmström tammetti falliment MALLIA insista li l-gvern Malti se jkompli jippersisti li jkun hemm tqassim xieraq tal-immigranti mill-pajjiżi kollha. "Hemm pajjiżi li lanqas jieħdu rifuġjat wieħed. U billi m'hemmx leġislazzjoni li torbot l-istati membri biex jaqsmu r-responsabbiltajiet tal-immigranti regolari, ħadd ma jista' jimponi fuq ħadd. Hemm minnhom li jwegħduk li se jieħdu għandhom 250 refuġjat u lanqas jieħdu n-nofs u ma tista' tgħidilhom xejn." Il-kummissarju responsabbli għal-Libertà, Sigurtà u Ġustizzja, Cecilia Malmström iddikjarat kważi falliment totali fejn tidħol solidarjetà bejn l-istati membri tal-UE. Qalet b'mod ċar li s-solidarjetà bejn stati membri biex jaċċettaw refuġjati, hi waħda ineżistenti fejn qalet li huma l-ftit stati li pprovdew refuġju filwaqt li ħafna oħra m'aċċettaw ebda refuġjat. Hi qalet li fl-aħħar sena sitt membri stati aċċettaw inqas minn 250 refuġjat bejniethom. Dan bla dubju jfisser li jew l-Unjoni Ewropea falliet f 'dan ir-rigward inkella kienet il-Kummissarju stess li falliet milli twassal il-messaġġ mal- istati kollha. Dwar dan il-fatt il-Ministru Vella qal li hu ma jistax jeħodha kontra Cecilia Malmström fuq dan il-fatt għax hi taġixxi biss fil-konfini tal-Unjoni Ewropea, "xtaqet kemm xtaqet li jkun hemm tqassim responsabbli ta' refuġjati, ma setgħetx timponi fuq l-ebda stat membru. Għax l-UE ma tagħtihiex kompetenza esklussiva biex tkun tista' tagħmel dan. Kulma tista' tagħmel tappella biss u jidher li dan l-appell waqa' fuq widnejn torox u għalhekk tħossha frustata. Wieħed irid jammetti li l-aktar pajjiż li jieħu immigranti u refuġjati hu pajjiżha, l-Iżvezja." Dwar jekk tistax issir leġislazzjoni fl-Ewropa li timponi tqassim responsabbli tal-immigranti irregolari madwar l-istati membri kollha, Vella qal li biex isir dan irid ikun hemm vot unanimu, "U ibqa' żgur li mhux se jivvota kulħadd favur din il-leġislazzjoni. Il- Gvern irid ikompli jippersisti li jkun hemm tqassim responsabbli u jinsisti li l-ħafna proposti li għamlet it-task force fil-Mediterran jiġu implimentati. Irid ikun hemm relazzjonijiet aħjar ma' dawk il-pajjiżi minfejn ġejjin dawn l-immigranti u aktar għajnuna. Anke l-proposti ta' x'għandu jsir waqt il-vjaġġ tal-immigranti fid-deżert, fil-baħar u meta jiġi meħlus mill-baħar." Intant, id-Deputat Nazzjonalista Jason Azzopardi f 'kumment mal-ILLUM qal li jekk il-qsim tar- responsabbiltà hu kompitu kollettiv tal-istati membri allura kif nistgħu ngħidu li hu falliment tal-Kummissjoni jew Kummissarju? "Sakemm u dment il-Gvern Malti ma jikkonvinċix stati membri oħra biex jaqsmu l-piż, allura l-problema se tibqa'" qal Azzopardi. Qal li l-PN jaqbel u ilu jgħid li jkun essenzjali li jkun hemm politika komuni ta' migrazzjoni fl-UE, ħaġa li anke l-Kummissarju l-ġdid għall- Immigrazzjoni wera ruħu favuriha. "Aħna naqblu, u ilna ngħidu li jeħtieġ li r-Regolament ta' Dublin ikun emendat għax ma jistax ikun li Malta, bl-ikbar żona ta' tfittxija u salvataġġ, tibqa' terfa' tant piż sproporzjonat għad-daqs tagħha. Issa hu fatt pożittiv li l-Kummissarju l-ġdid qal li hu favur tali tibdil, però fl-aħħar mill-aħħar, id-deċiżjoni hija f 'idejn kull wieħed mill-istati membri" qal Azzopardi. Kompla jgħid li sakemm u dment li jkun hemm imqar stat wieħed biss li ma jaqbilx, allura ma jkunx hemm unanimità u allura t-tibdil ma jseħħx. "Għalhekk, iktar milli nippuntaw subgħajna lejn direzzjoni mhux korretta, jeħtieġ, anke jekk dan żgur mhux faċli, li l-Gvern Malti jikkonvinċi ħafna iktar stati, speċjalment dawk tan-naħa ta' fuq tal-Ewropa. Wieħed kien jistenna, pereżempju, li bil-ħbiberija personali li hemm bejn il-PM Malti u l-President Franċiż, Franza taċċetta numru ta' immigranti minn Malta imma dan għadu ma seħħx" temm jgħid Azzopardi. Tkompli minn paġna 1 Aktar minn 300 proposta għall-baġit 2015 FILFTUĦ tat-tieni laqgħa ta' konsultazzjoni mal-imsieħba soċjali rappreżentati fi ħdan il-Kunsill Malti għall- Iżvilupp Ekonomiku u Soċjali l-MCESD, il-Ministru għad- Djalogu Soċjali, Affarijiet tal-Konsumatur u Libertajiet Ċivili Helena Dalli semmiet kif fil-ġimgħat li għaddew saru bosta preżentazzjonijiet mill- Ministru tal-Finanzi dwar id-dokument ta' qabel il-baġit fost l-oħrajn mal-MEUSAC bl- iskop li jintlaħaq il-pubbliku kollu. "Kull persuna kellha aċċess biex issemma' leħinha f 'dal- proċess u bħala Gvern impenjati li nkomplu nifirxu dan id- djalogu" qalet il-Ministru Dalli. Hija fissret id-dokument ta' qabel il-baġit bħala wieħed mill-aktar importanti u faħħret l-inizjattiva li ttieħdet mill-Ministeru tal-Finanzi li sar proċess ta' konsultazzjoni f 'lokalitajiet differenti. F'indirizz tal-ftuħ, il-Ministru għall-Finanzi Edward Scicluna semma' kif il-Gvern irċieva 25 sett ta' proposti differenti għall-baġit 2015 minn organizzazzjonijiet differenti li jinkludu unjins, korpi kostitwiti, għaqdiet u assoċjazzjonijiet. B'kollox dawn jammontaw għal aktar minn 300 proposta separata. Scicluna laqa' b'sodisfazzjon il-mod ta' kif il-proċess ta' konsultazzjoni qed isir wieħed aktar istituzzjonalizzat fejn ix-xahar ta' Settembru qed ikun dedikat kollu għall- konsultazzjoni mal-imsieħba soċjali u mal-pubbliku. B'kollox il-Gvern se jkun organizza tmien laqgħat ta' konsultazzjoni mal-pubbliku, imsieħba soċjali u soċjetà ċivili b'rabta mal-baġit 2015. Il-proposti mressqa mill- imsieħba soċjali jiffukaw fuq l-oqsma tas-servizzi soċjali, it-turiżmu, l-edukazzjoni, l-amministrazzjoni pubblika, il- kummerċ, il-qasam tal-impjiegi u dwar Għawdex. L-organizzazzjonijiet li ssottomettew proposti lill-Gvern dwar il-baġit 2015 kienu l-Kamra tal- Kummerċ, Intrapriża u Industrija, l-Assoċjazzjoni Maltija ta' Min Iħaddem (MEA), l-Assoċjazzjoni tal- Lukandi u Ristoranti Maltin (MHRA), l-Assoċjazzjoni tat-Turiżmu Għawdxija (GTA), l-Assoċjazzjoni tal- Iżviluppaturi Maltin (MDA), Malta Business Bureau, l-Assoċjazzjoni tal-Importaturi tal-Karozzi, Malta Institute of Management, Kumitat Reġjonali għal Għawdex, BAG Malta, Federazzjoni Maltija Vetturi Antiki, Royal Air Force Association, MSV Life, il-Konfederazzjoni Maltija tal-Organizzazzjonijiet tan- Nisa, Action for Breast Cancer Foundation, il-Federazzjoni Maltija ta' Organizzazzjonijiet għall-Persuni b'Diżabilità, l-Assoċjazzjoni għas-Saħħa Mentali, il-Forum Unions Maltin (For.U.M), il-General Workers Union (GWU), il-Konfederazzjoni tat-Trade Unions Maltin (CMTU), il-Kamra ta' Intrapriża Żgħar u Medji (GRTU), il-Union Ħaddiema Magħqudin, il-Kamra tal-Kummerċ Għawdxija, il-Kunsill Nazzjonali tan-Nisa u l-Kummissjoni Nazzjonali għall-Promozzjoni tal-Ugwaljanza (NCPE). Iċ-Ċermen tal-MCESD John Bencini fisser il-laqgħa tal-lum bħala waħda importanti ħafna fejn l-imsieħba soċjali joħorġu bil-proposti tagħhom. L-MCESD se jkun qed jerġa' jiltaqa' għada fit-3pm biex l-imsieħba soċjali jkomplu jiddiskutu l-proposti tagħhom mal-Ministru tal-Finanzi. Bencini, Dalli u Scicluna waqt il-laqgħa ta' konsultazzjoni