Issue link: https://maltatoday.uberflip.com/i/1544727
04 IL-ĦADD 3 TA' MEJJU 2026 • illum Dawk li mhux se jikkontestaw u dawk li ma tħallewx Ir-ritratti tal-ġimgħa Roderick Galdes L-eks ministru Roderick Galdes ħabbar li mhuwiex se jikkon- testa l-elezzjoni ġenerali li ġejja, u qal li d-deċiżjoni ttieħdet sa- biex il-Partit Laburista jiġi protett minn attakki partiġġjani sabiex ikun iffukat fuq li jinkiseb l-aħjar riżultat possibbli għall-partit u l-pajjiż. F'post fuq il-paġna tiegħu ta' Facebook ippubblikat nhar is- Sibt, Galdes qal li l-"ogħla interess" tiegħu dejjem kienu u jibqgħu l-familja tiegħu, il-partit u l-pajjiż. Huwa nnota li ntqal ħafna dwar il-kandidatura potenzjali tiegħu, u insista li diġà tkellem "b'mod ċar, dirett u mingħajr tlaqliq", u żamm mad-dikjarazzjonijiet preċedenti tiegħu bis-sħiħ, partikolarment rigward avvenimenti li seħħew fi ħdan l-eżekuttiv nazzjonali tal-partit. Dak l-istess eżekuttiv dil-ġimgħa vvota biex ma jħallix lil Gal- des jikkontesta l-elezzjoni. Huwa qal li l-Partit Nazzjonalista u "ċerti fazzjonijiet estremi" li għad għandhom influwenza fi ħdanu qegħdin jippruvaw jużaw ismu b'mod partiġġjan sabiex jagħmlu ħsara lill-Partit Laburista. "Huwa għal din ir-raġuni biss li ħadt id-deċiżjoni li ma nkomp- lix bil-ħidma tiegħi sabiex nikkontesta f 'din l-elezzjoni," qal. Edward Zammit Lewis L-eks Membru Parlamentari Laburista u ministru Edward Zammit Lewis ikkonferma li mhux se jikkontesta l-elezzjoni ġenerali li jmiss. Zammit Lewis iddeskriva l-politika bħala "missjoni ta' sfida" li teħtieġ enerġija u impenn kostanti, mhux biss minn dawk involu- ti direttament iżda wkoll mill-familji tagħhom. Huwa qal li r-rwol iġib ukoll "sodisfazzjon kbir," partikolarment meta jgħin lin-nies u jikkontribwixxi għal riformi sinifikanti. B'referenza għas-snin ta' qabel l-2013, Zammit Lewis qal li kellu rwol, flimkien ma' oħrajn taħt it-tmexxija ta' Joseph Muscat, biex jgħin fit-trasformazzjoni tal-partit f '"forza kredibbli u eleġġibbli." Mill-2013, huwa serva bħala Membru Parlamentari jirra- ppreżenta t-8 Distrett Elettorali, u kellu rwoli bħala segretarju parlamentari u aktar tard ministru għal kważi disa' snin. "Wara riflessjoni bir-reqqa mal-familja tiegħi, ħadt id-deċiżjoni diffiċli li ma nikkontestax l-elezzjoni ġenerali li ġejja u li nieħu pass lura mill-politika ta' quddiem nett, filwaqt li niffoka aktar fuq il-professjoni legali tiegħi," qal. David Agius L-eks Viċi Kap tal-Partit Nazzjonalista David Agius ukoll ħabbar li mhux se jkun qiegħed jikkontesta l-elezzjoni ġenerali li jmiss, u b'hekk se jtemm karriera politika li damet 25 sena. Matul il-karriera tiegħu, huwa serva bħala whip tal-Gvern fl- aħħar leġiżlatura taħt Lawrence Gonzi, u wara l-2013 kien whip tal-Oppożizzjoni. Aktar tard, inħatar Viċi Kap tal-PN għall-Af- farijiet Parlamentari. Fl-2024, huwa kkontesta wkoll l-elezzjoni tal-MEP. Carm Mifsud Bonnici Il-Membru Parlamentari tal-Partit Nazzjonalista Carm Mifsud Boninci ukoll mhuwiex se jikkontesta l-elezzjoni ġenerali li jmiss. F'filmat fuq il-paġna tiegħu ta' Facebook, huwa rringrazzja lill-votanti kollha li fdawh matul is-snin. Huwa serva bħala Membru Parlamentari għal 28 sena bħala backbencher fuq in-naħa tal-gvern, Segretarju Parlamentari għall-Ġustizzja u l-Intern, Ministru tal-Ġustizzja u l-Intern u membru tal-grupp parlamentari fuq in-naħa tal-oppożizzjoni. Mifsud Bonnici qal li wasal iż-żmien li oħrajn jimlew postu u jibnu fuq ix-xogħol preċedenti li wettaq.