Issue link: https://maltatoday.uberflip.com/i/1358362
23 rakkonti illum • Il-ĦADD 4 TA' APRIL 2021 Sharon Calleja Bużżieqa ħamra (l-ewwel parti minn erbgħa) J iena għandi għaxar snin. Ngħix il-Kanada, f'raħal ħelu li jissejjaħ Toronto ġewwa Ontario. Għalkemm il-familja tiegħi għandhom dixxendenza Maltija, in-nan- niet tiegħi kienu emigraw hawn, f'dan il-pajjiż imkattar sew. Pajjiż sabiħ ħaf- na, mimli natura, toroq wiesa' u qatt ma kont issib tlajja u nżul bħal ma għandkom hemm Malta. Kont imdorrija ngħix hawn, fi djar tal- briks u l-injam, bl-għatu ta' fuq kulur ma- ronja magħmul minn biċċiet tal-fuħħar. Quddiem id-dar kellna ġnien kbir bil- ħaxix ittrimmjat u ndukrat sew. Fuq wara kien hemm qisha għalqa ħelwa fejn kont inżomm ir-rota li kien tani missieri f'jum għeluq snini, xi siġar żgħar ta' ma nafx x'tip kienu u xi pjanti bil-fjuri li ommi kienet tifqa' bl-ilma, li dejjem kienu jmutu mal-ewwel borra xitwija li kienet tagħmel. Eħe, u kien hemm qisha kaxxa żgħira tal-injam fejn kont inpoġġi l-karawett għall-iskwirils kannella ċari li kienu jiġu bl-abbundanza jnaqqru u jerġgħu jaħarbu 'l hemm. Dakinhar kont qiegħda bilwieqfa lieb- sa l-uniformi griża fil-grawnd tal-iskola biswit sħabi tal-klassi, flimkien mat-tfal kollha li kienu jattendu din l-iskola kat- tolika, bl-għalliema linja sħiħa quddiem- na b'wiċċhom kollha mċarrat fi tbissima ħelwa. F'idejna kellna bużżieqa ħamra kull wieħed. Disgħa u disgħin bużżieqa ħamra. Daqshekk kien hemm tfal u għalliema b'kollox. Daqshekk kien hemm bżieżaq. "Issa malli ngħidilkom, itilqu ż-żigarella minn idejkom!" saħaq b'ħanġra daqsxiex is-surmast li kien qiegħed fuq biċċa tarġa fil-ġenb ħalli jkun jista' jikkomunika u ja- ra lil kulħadd. Dawwar ħarstu lejn it-tfal kollha li kien hemm maġenbi fil-grawnd. Kien jidher eċċitat u f'idejh kellu bużżieqa huwa wkoll. U għamlilna s-sinjal biex nitilquhom. F'sekonda waħda, is-sema biddlet il- lewn! Minn ċelesti ġiet ħamra! Bżieżaq ħomor. Bżieżaq ħomor tielgħin 'il fuq, 'il fuq. Biċċa minnhom donnhom baqgħu xi ftit batuti aktar mill-oħrajn u kien hemm dawk li donnhom kienu f'kompetizzjoni sabiex jimpikaw liema minnhom ser jit- ilgħu aktar 'il fuq l-ewwel. Kważi jilħqu l-isħab. Jisparixxu f'dimensjoni ta' atmos- fera oħra. Jien hekk bdejt naħseb! Nicholas tani daqqa ta' minkeb bilmod. Għajnejh żoroq kbar iħarsu lejja. Tajtu daqqa t'għajn ħafifa għal mument. U erġajt ħarist 'il fuq, inħossni mitlufa fil-kulur aħmar. Inħossni noħlom li donni kont qiegħda fuq tapit aħmar, mitlufa 'l bogħod minn dawk it-tfal kollha li kienu maġenbi. "Tiffany!" qalli Nicholas bejn par xedaq mheżża ma' xulxin. "Xi trid?" staqsejtu. Nicholas kien l-aqwa ħabib li qatt kelli. Kont iltqajt miegħu l-ewwel darba meta dħalt f'din l-iskola. Daqxejn ta' tifel ħelu b'xagħru bjond u għajnejh kbar u sbieħ. Kien donnu ħa grazzja miegħi mill-ewwel għaliex xħin konna suppost norqdu wara nofsinhar, erħilu kien iġib ix-xugaman tiegħu maġenb tiegħi u jgħid lil kulħadd li jiena l-għarusa tiegħu. U jiena kont nieħu gost inħares lejh. Kien wisq sabiħ u ħelu! U hu kien jgħidli li xagħri nnukklat ħamrani li ommi kienet dejjem tagħmilli toppu fuq wara, bil-bżiebeż neżlin għal fuq moħħi, kien jixraqli mhux ftit. Kien jgħidli li flimkien ma' għajnejja kbar u su- wed, kont qisni pupa. U jien kont nemmnu. Imma dakinhar rajtu jħares 'il fuq lejn il- bżieżaq ħomor b'mod xi ftit stramb. Wiċċu kellu dehra differenti minn kull darba li kont rajtu. Differenti minn tat-tfal l-oħra, li bħali kienu qegħdin jammiraw din is-sbuħija. Donnu kien qed jibża'. Jistkerraħhom. "Jiena d-dar dejjem nilgħab b'bużżieqa ħamra," qalli b'leħen kemmxejn baxx. "Bużżieqa bħal dawn." "Tajjeb," weġibtu mingħajr ma tajt kasu żżejjed. Ridt nibqa' nħares lejn il-bżieżaq sa' xħin ma jibqa' jidher xejn minnhom. "Tiffany, bis-serjeta qed ngħidlek!" kważi għolla leħnu miegħi. "Iva, tajjeb!" erġajt weġibtu, nieħu nifs fil-fond u kważi nħoss leħnu jdejjaqni. "Qatt m'għedtlek qabel." "U għalfejn qatt m'għedtli?" staqsejtu mingħajr ma nħares lejh. "Għax qatt m'għedt lil ħadd. In-nannu u n-nanna jgħiduli biex ma ngħid lil ħadd." U dak il-ħin, il-bżieżaq kollha għebu 'l bogħod u donnu ma kien għadu jidher xejn minnhom. Ix-xemx li kienet xi ftit bajdanija moħbija qalb is-sħab kienet bdi- et iddejjaqni xi ftit ukoll. Allura ħarist lejh. "Imma għax tilgħab b'bużżieqa ħamra, ma fiha xejn ħażin," weġibtu, hekk kif it-tfal bdew imorru lura lejn il-klassijiet tagħhom u aħna t-tnejn bdejna nimxu fil- liera warajhom. "Le hux, ma fiha xejn ħażin." Għalkemm ma tantx ikkonvinċieni, da- kinhar ma erġajniex semmejniha. Tlaqna lejn id-dar bħas-soltu. Peress illi jiena kont noqgħod fit-triq ta' wara tiegħu, Nicholas kien jgħaddi għalija u nimxuha flimkien lejn l-iskola kuljum. Filgħaxija kien iwassalni sal-bieb ta' dari u kien idur il-kantuniera ħalli jmur lejn daru. Imma l-għada, donni erġajt bdejt naħseb fuqha. "Lgħabt bil-bużżieqa lbieraħ?" staqsejtu b'ton każwali, nipprova ma nidħaqx bih. Xħin kien qalli hekk, kont rajtu xi ftit ġest infantili. "Tgħajjatx!" inħasad, hekk kif res- saq wiċċu eqreb lejn tiegħi u stajt nara l-farrett żgħir li kellu fuq moħħu li kien għamel meta kien waqa' t-taraġ tal-in- jam tad-dar tagħhom li kien jagħti għal ġol-kantina isfel. "U iva, m'għajjatx!" weġibtu, għajnejja suwed iħarsu lejh bl-ikrah. "Darboħra ma ngħidlek xejn. Suppost m'għedtlekx!" qalli b'ton maħruq. "Ma tgħidx lili? U għalfejn ma tgħid- lix?" staqsejtu nitnerveż xi ftit. "Għax qaluli biex ma ngħidx." "Min qallek biex ma tgħidx?" staqsejtu erġajt. Ħa nifs twil u ma weġibnix. "Int ser tgħidli jew?" "In-nannu u n-nanna." Kemmixt moħħi. "Xi sigriet dan jiġifieri?" "Tiffany." "Eeeee." "In-nanniet qaluli biex ma ngħid lil ħadd li noqgħod nilgħab magħhom b'bużżieqa ħamra." In-nanniet. Ma kontx naf li kellu n-nanniet għad- hom ħajjin. Darba biss kont mort għandu. Dakinhar tal-festin f'għeluq sninu. Qatt ma kien jistedinni. Fil-festin kienu stiednu ħafna nies u kien laqqgħani m'ommu. Missieru kien mejjet. Apparti l-fatt li kien tellgħani f'kamar- tu, fl-attiku, kont għamilt xi kwarta sħiħa nħares lejn taraġ tal-injam skur li kien jinsab fil-ġenb tal-kuritur. Kemm kien sabiħ! Il-puġġaman kien imdawwar b'girlanda tal-fjuri sbieħ bojod tal-plastik qishom reali! "Kemm hu sabiħ dak it-taraġ!" kont għedtlu mal-ewwel daqqa t'għajn. "Mhux hekk!" kien qalli. "Meta kont iżgħar, kont tgerbibtu kollu u qsamt moħħi!" "Imma lili jogħġobni," kont għedtlu dak- inhar tal-festin. "Tiftakar dak it-taraġ tal-injam, Tiffa- ny?" qalli Nicholas fil-klassi. Illum. Għamiltlu iva b'rasi. "In-nanniet hemm isfel ikunu. Fil-kan- tina. U jkollhom bużżieqa ħamra. Qaluli biex ma ngħid xejn lil ħadd." Berraqt għajnejja b'dak li kien għadu kemm qalli. "Fil-kantina?" erġajt staqsejtu biex nara fhimtx sew. Għamili iva b'rasu bilmod. "Ma jitilgħux fuq?" staqsejtu, nipprova ma nistagħġibx. "Le. Qatt."