Issue link: https://maltatoday.uberflip.com/i/1378864
03 illum • IL-ĦADD 30 TA' MEJJU 2021 aħbarijiet Nofs il-poplu jrid kontroll fuq in-numru ta' ħaddiema barranin li jiġu Malta ALBERT GAUCI CUNNINGHAM Kważi nofs il-poplu Malti, preċiżment 49.7%, jemmen illi għandu jkun hemm sa massimu ta' ħadddiema barranin f 'pajjiżna. Il-kwistjoni ta' ħaddiema barranin kienet tqum diversi drabi u mistennija terġa' tqum hekk kif l-ekonomija terġa tibda tirranka u tinħoloq domanda għal impjiegi, li ma tistax tkun fornuta b'ħaddiema Maltin u Għawdxin. Dan jirriżulta minn sondaġġ xjentifiku tal-gazzetta ILLUM magħmul minn Polar. Hekk kif il-popolazzjoni ta' ħaddiema barranin telgħet għal madwar 70,000 il-Ministru tal- Finanzi kurrenti staqsa jekk forsi wasalx iż-żmien li jiddaħħlu xi forma ta' kwoti, ta' ħaddiema li ġejjin minn pajjiżi terzi (ħaddiema mill-UE għandhom il-libertà kollha li jiġu jaħdmu hawn). Minn naħa l-oħra 29.2% tal- poplu ma jaqbilx ma' massimu jew xi tip ta' kwota ta' barranin, filwaqt illi 21% qalu illi ma jafux jekk jaqblux jew le. L-anzjani/mezza età l-aktar li jaqblu ma massimu ta' ħaddiema barranin Interessanti naraw illi dan is- sondaġġ xjentifiku juri illi l-aktar li huma favur huma dawk li jinsabu tard fil-mezza età u kmieni fl- anzjanità (51-65) b'50.9% jgħidu li jaqblu ma' kwoti, 22% ma jaqblux u 27% ma jafux. 48.8% ta' dawk aktar minn 65 sena jaqblu ma' kwoti ta' ħaddiema, filwaqt li huma biss 16.5% li ma jaqblux - l-iktar persentaġġ baxx fost l-etajiet kollha. Minn naħa l-oħra dawk li huma żgħażagħ u kmieni fil- mezza età huma ħafna iktar kontra l-idea ta' massimu ta' ħaddiema barranin. Fil-fatt 43.8% ma jaqblux u 39.6% jaqblu, filwaqt illi 16.4% ma jafux jekk jaqblux jew le. Ftit aktar minn nofs jew 50.2% ta' dawk bejn l-etajiet ta' 36 u 50 sena jaqblu ma' xi forma ta' kwoti ta' ħaddiema barranin, 33.3% ma jaqblux u mill-ġdid 16.4% ma jafux jaqblux jew le. Meta mbagħad wieħed iħares lejn kif wieġbu l-parteċipanti skont il-livell edukattiv tagħhom, issib illi l-aktar li huma favur huma dawk b'edukazzjoni sekondarja u ftit wara dawk li għandhom edukazzjoni post- sekondarja. Fil-fatt, huma kważi 56% ta' dawk li għandhom edukazzjoni sekondarja li jaqblu ma' massimu, filwaqt li huma 52% ta' dawk b'edukazzjoni post- sekondarja li jaħsbu l-istess. Jista' jkun li r-raġuni wara dan huwa l-fatt li fost dan is-settur hemm inċidenza ħafna akbar ta' ħaddiema barranin. L-aktar persuni kontra, minn naħa l-oħra, huma dawk b'edukazzjoni terzjarja fejn maġġoranza relattiva ta' 46.4% jemmnu li m'għandux ikun hemm massimu ta' ħaddiema barranin fil-pajjiż. Minkejja dan 39.5% xorta jaqblu u 14% wieġbu illi ma jafux. Fil-livell ta' edukazzjoni primarja, fejn ukoll wieħed jifhem illi hemm inċidenza ogħla ta' ħaddiema barranin, maġġoranza relattiva ta' 45.8% wieġbu illi ma jafux jaqblux jew le, 34.2% jaqblu ma' xi forma ta' kwoti u 19.9% biss qalu li ma jaqblux. Kemm in-Nazzjonalisti u anke l-Laburisti jaqblu ... imma votanti PN ftit aktar Meta wieħed jaqsam lin-nies skont kif ivvutaw jirriżulta li l-maġġoranza kemm ta' dawk li vvutaw lill-PN u anke ta' dawk li vvutaw lill-PL fl-aħħar elezzjoni ġenerali huma favur xi forma ta' massimu stabbilit fuq kemm jiġu ħaddiema barranin f 'pajjiżna. Fil-fatt, 48.4% ta' dawk li vvotaw Labour fl-2017 jaqblu ma' xi forma ta' kwota filwaqt li 27% ma jaqblux (24.5% ma jafux). Maġġoranza assoluta ta' votanti tal-PN, jiġifieri 53%, qalu illi jaqblu ma' massimu ta' ħaddiema, filwaqt li 29.2% qalu li ma jaqblux (17.8% ma jafux). Għalkemm id-differenzi huma żgħar din tirrifletti xi ftit ukoll in-narrattiva politika dwar ħaddiema barranin fl-aħħar tmien snin. Minn naħa l-oħra ħadd mill- parteċipanti li fl-2017 ivvota lill-Alternattiva Demokratika ma qal li jaqbel ma' kwoti ta' barranin u dawn kollha wieġbu li huma kontra (100%). Minn dawk li ma vvutawx fl- 2017 maġġoranza relattiva, jew 43.3% qalu li jaqblu ma' kwoti, 37.8% huma kontra u 18.8% ma jafux. Tat-Tramunatana tal-Port u l-Għawdxin l-aktar favur kwoti U finalment meta taqsam lill- parteċipanti skont fejn jgħixu jirriżulta illi kullimkien hemm maġġoranza ta' nies li huma favur xi tip ta' kwoti, imma maġġoranza assoluta tinsab biss fit-tramuntana tal-Port fejn 52% jaqblu. Din iż-żona tinkludi lil Tas Sliema, San Ġiljan, Swieqi, Birkirkara, Ħamrun, Ħal Qormi, l-Imsida, il-Gżira u postijiet oħrajn. Intant 28% ma jaqblux u 20% ma jafux. Jekk naqsmu l-fliegu lejn Għawdex insibu kif 48.7% jaqblu ma' kwoti ta' ħaddiema barranin, 20.8% ma jaqblux u 30.4% tal-Għawdxin ma kinux jafu jekk jaqblux jew le. L-inqas żona fejn il- parteċipanti qalu illi jaqblu ma' kwoti kienu fit-Tramuntana, fejn xorta iżda maġġoranza relattiva ta' 39.3% qalu li jaqblu ma' tali kwoti. Minn naħa l-oħra 33.3% qalu li ma jaqblux filwaqt li 27.3% ma kinux jafu kif se jwieġbu. Din iż-żona tinkludi l-Mellieħa, San Pawl il-Baħar, Naxxar u l-Mosta. Hemm bżonnhom għall-ekonomija u hawn madwar 70,000 ħaddiem barrani f'pajjiżna. Iżda 49.7% tal-poplu Malti jemmen li jeħtieġ illi jkun hemm sa massimu ta' ħaddiema barranin li jistgħu jidħlu pajjiżna Iva 52.9% Le 29.2% Ma nafx 17.8% Iva 48.4% Le 27% Ma nafx 24.5% Taqbel li jkun hemm massimu ta' ħaddiema barranin li jistgħu jiġu Malta? (Votanti PN 2017) Taqbel li jkun hemm massimu ta' ħaddiema barranin li jistgħu jiġu Malta? (Votanti PL 2017)