Illum previous editions

ILLUM 17 June 2018

Issue link: https://maltatoday.uberflip.com/i/994979

Contents of this Issue

Navigation

Page 19 of 31

illum | Il-Ħadd 17 ta' Ġunju 2018 20 Opinjoni L -Uffiċċju Nazzjonali tal-Verifika għadu kif ikkonkluda investigazzjoni dwar iċ-Ċentru Interpretattiv f 'Ħad-Dingli. L-investigazzjoni fittxet li tiddetermina jekk kienx hemm xi ftehim minn wara l-kwinti bejn uffiċjali pubbliċi diversi biex is-sit f 'Ħad-Dingli jkun ittrasformat minn ċentru interpretattiv għal stabbiliment tal-ikel. L-investigazzjoni, kif spjegat f 'rapport bl-Ingliż li ppubblika l-Uffiċċju Nazzjonali tal- Verifika ma sab l-ebda prova li tista' tissostanzja allegazzjonijiet dwar frodi jew korruzzjoni. Hemm imma referenza għal dak li qed jissejjaħ "oversight", jiġifieri żball. Ċentrali fl-iżvilupp ta' dan l-iżball insibu l-awtorità li tieħu ħsieb l-ippjanar dwar l-użu tal-art. Dakinhar MEPA, illum PA. Meta l-Kunsill Lokali ta' Ħad-Dingli ssottometta l-applikazzjoni bażika (dik li nirreferu għaliha bħala outline development permission) (applikazzjoni PA5314/02) il-kunsill kien qed jitlob li jingħata permess għal żona fejn iservu l-ikel (id-dokumenti jirreferu għal catering area). Ir-rapport tal- Uffiċċju tal-Verifika jagħmel referenza għal dokumenti tal-MEPA biex juri li l-Kunsill Lokali ta' Ħad-Dingli kien qed jintalab jirrevedi l-proposta tiegħu, u b'mod partikolari biex ineħħi mill-pjanti kull referenza għal żona fejn iservu l-ikel. Dan it-tibdil, jenfasizza r-rapport "included the elimination of catering services". Biex l-affarijiet ikunu ċari ħafna, il-MEPA insistiet biex tkun emendata wkoll il-proposta ta' żvilupp innifisha. Il-proposta oriġinali ta' żvilupp li ppreżenta l-Kunsill Lokali kienet dwar twaqqigħ ta' żewġ binjiet eżistenti u l-bini minflok ta' binja ta' tliet sulari b'disinn modern b'qies ikbar minn dak tal-bini eżistenti. Il-pjanti jipprovdu għal kċina żgħira u żona mdaqqsa fejn joqogħdu bilqiegħda n-nies. Il-MEPA insistiet, u l-Kunsill Lokali ta' Ħad-Dingli aċċetta, li l-proposta ta' żvilupp kellha tkun emendat biex tikkonċerna r-restawr tal- binjiet eżistenti flmkien ma' alterazzjonijiet u żidiet għalihom biex ikunu mibdula f 'ċentru interpretattiv. Il- bejgħ ta' ikel u xorb fuq is-sit kellu jkun limitat għal dak li seta' jsir bil-magni (vending machines). Iktar tard il-Kunsill Lokali ta' Ħad-Dingli ppreżenta applikazzjoni dettaljata (full development permission) li kienet approvata mill-MEPA. Din l-applikazzjoni approvata (PA0425/08), jgħidilna r-rapport tal-Uffiċċju tal- Verifika, "ippermettiet li ikel u xorb setgħu jinxtraw miċ- ċentru interpretattiv bħala attività anċillari (allowed food and drink to be served at the Interpretation Centre as an ancillary activity). Dan minkejja li dan kollu kien ipprojbit mill-permess bażiku li kien approvat iktar qabel, meta kienu ġew stabiliti l-parametri bażiċi tal-proġett. Ir-rapport tal-Uffiċċju tal-Verifika jgħidilna li meta l-investigaturi għarblu liċ- Chairperson tal-Kummissjoni għall-Kontroll tal-Iżvilupp fuq il-każ, din qaltilhom li d-diskrepanza kienet żball u li hi kellha l-impressjoni li l-permess approvat kien jirrifletti d-diskussjoni li saret fil-bord u allura kien jipprojbixxi li jkun possibli li sservi l-ikel fis-sit (this variance as an oversight, and that she was under the impression that the permit issued reflected the Board's discussion, and therefore excluded catering on site.) Il-kelma li tintuża hi "oversight", liema kelma tfisser "żball li jsir bi żvista għax tkun qabżitlek xi ħaġa". Meta fittixt fid- dokumentazzjoni tal-MEPA sibt li mill-minuti tal- laqgħat tal-Kummissjoni għall-Kontroll tal-Iżvilupp ma tantx jidher li qabeż xejn biex sar dan "l-iżball". Fil-fatt il-minuti tat-18 ta' Marzu 2009 speċifikament jgħidu li l-Kummissjoni kellha l-intenzjoni li tirrifjuta l-applikazzjoni minħabba li dak propost dwar il-"catering facilities" (jiġifieri l-użu magħruf bħala Class 6 use) ma kinux approvati fl-ewwel permess. Fid-dokument tal-MEPA li nirreferu għalih bħala DPAR (Development Permit Application Report) fit- taqsima tiegħu intitolata "Notes to Committee" hemm miktub li l-perit tal-Kunsill Lokali rinfaċċjat b'dan ippreżenta pjanti mibdula li fihom il-faċilitajiet għall- catering tneħħew. F'laqgħat li saru iktar tard mill-Kummissjoni għall- Kontroll tal-Iżvilupp, din l-intenzjoni tal-Kummissjoni nbidlet u l-applikazzjoni bil-faċilitajiet tal-catering b'kollox kienet approvata nhar l-20 ta' Jannar 2010. Dan tista' ssejjaħlu kollox minbarra "żball". Kienu jafu x'inhuma jagħmlu. Ir-rapport tal-Uffiċċju Nazzjonali tal-Verifika jgħidilna li "Din l-investigazzjoni tinnota li bejn it-18 ta' Marzu 2009 u l-10 ta' Marzu 2010, il-MEPA bidlet il-pożizzjoni tagħha minn waħda li teskludi l-faċilitajiet li jipprovdu għat-tisjir tal-ikel (Class 6 facilities) għal waħda li tippermettihom bħala faċilità anċillari." Flok mill-bieb daħlu mit-tieqa. Il-mistoqsija bażika hi waħda sempliċi ħafna: x'ġara bejn it-18 ta' Marzu 2009 u l-10 ta' Marzu 2010 biex wassal lill-Kummissjoni biex tibdel il-fehma tagħha? Din il-mistoqsija tibqa' bla tweġiba wara li nkunu qrajna r-rapport tal-Uffiċċju Nazzjonali tal-Verifika. Huma biss iċ-ċwieċ li jistgħu jaċċettaw l-ispjegazzjoni li dan kien żball! Kemm ħasbuna ċwieċ? CARMEL CACOPARDO carmel.cacopardo@alternattiva.org.mt • http://carmelcacopardo.wordpress.com Id-diskrepanza kienet żball u kellha l-impressjoni li l-permess approvat kien jirrifletti d-diskussjoni li saret fil-bord u allura kien jipprojbixxi li jkun possibli li sservi l-ikel fis-sit Meta fittixt fid-dokumentazzjoni tal- MEPA sibt li mill-minuti tal-laqgħat tal-Kummissjoni għall-Kontroll tal- Iżvilupp ma tantx jidher li qabeż xejn biex sar dan 'l-iżball'.

Articles in this issue

Links on this page

Archives of this issue

view archives of Illum previous editions - ILLUM 17 June 2018