Issue link: https://maltatoday.uberflip.com/i/1028261
19 Il-Ħadd 16 ta' Settembru 2018 | illum Editorjal Editorjal ILLUM, MEDIATODAY LTD, VJAL IR-RIĦAN, SAN ĠWANN SĠN 9016 Tel: (356) 21 382741-3, 21 382745-6 • Fax: (356) 21 385075 Ittri u Kummenti, Imejl: illum@mediatoday.com.mt Il-Protesta: Dritt fundamentali tiegħek ID-DRITT li tisma', tiddeċiedi, issemma' leħnek u fejn ikun hemm bżonn tieħu azzjoni huwa dritt demokratiku sagrosant, li ma jista' jittiefes taħt ebda ċirkostanza. Dan jinkludi d-dritt li tikteb, titkellem, tanalizza, taqra, tipprotesta, tistrajkja, tidħol fi trade union tal- għażla tiegħek u meta tkun ġustifikat, tieħu azzjoni, preferibbilment fil-qafas tal-liġi, biex tinstema'. Tul is-snin, qabel l-2013 taħt Gvern Nazzjonalista, kull meta tħabbret azzjoni jew saħansitra strajk jew protesta, speċjalment jekk dan kien jiġi mill- General Workers' Union, ħoll xagħrek u ġib iż-żejt. Editorjali biex jgħidulna kemm qed tagħmel ħsara din il-union lil pajjiżna u lill-kompetittività u politiċi min naħa tal-Gvern ifakkruna li l-protesta jew l-istrajk mhux għodda tajba, imma riflessjoni ta' unions 'militanti li għadda zmienhom'. X'ma nqalax meta kien hemm l-istrajk tax-xufiera ta' tallinja, qabel ma s-servizz kien privatizzat? Ix-xufiera ġew demonizzati, mgħajra u (għalkemm huma ma tantx għenu lilhom infushom) dawn il-ħaddiema ġew impinġija bħala għadu numru wieħed tas-soċjetà Maltija. Sangisugi u slavaġ, kif kienu ittimbrati tad- Dockyard kull meta fetħu ħalqhom fl-aħħar snin qabel ġiet privatizzata (qed nirreferu għall-aħħar snin), kif kienu ttimbrati tal-Airmalta meta strajkjaw, kif kienu ttimbrati wkoll Graffitti u kif kienu ttimbrati tal-mini-buses u tal-karozzi tal-funerali u tat-taxis u l-ħaddiema tal-port u l-lista tkompli. Jiġifieri tajjeb niftakru li wħud minn dawk li qed jippillaw għad-dritt tal- ħaddiem li jistrajkja u n-nies li jipprotestaw, sa ftit snin ilu riedu jarrestaw il-mexxejja tal-GWU għax għamlu strajk u kull meta xi ħadd kien jitniffes, pronti kienu jaqilgħlulu kulma għandu. Min-naħa l-oħra iżda wħud minn dawk li kienu jiġġieldu għad-dritt tal-istrajk u tal-protesta dakinhar, din il-ġimgħa ħarġu qatta bla ħabel jirremettu fuq grupp ta' żgħażagħ li pprotestaw biex arthom u artna ma tibqax tkun stuprata mir- rgħiba. Biex it-tfal tagħna u tagħhom meta jikbru jkollhom fejn jiġru u jieħdu nifs, lil hinn mill-konkrit u l-pompi tal-petrol/mini- markets li qed jiftħu kull erba' kanutnieri. Kien hemm min tant donnu offenda ruħu li l-Moviment Graffitti marru jipprotestaw, illi xtaq li l-Pulizija tawhom xebgħa tajba u ħallewhom tal-post. U dan għax qed jipprotestaw biex sakemm tinbidel il-politika tal-pompi tal- petrol ma jibqgħux joħorġu permessi għall-pompi. Allura b'daqshekk qed jagħmlu xi ħaġa daqstant skandaluża li kellna naraw dawk ix-xeni ta' dawn in- nies trattati ta' kriminali? Huwa veru li l-Moviment Graffitti kienu fuq proprjetà li ma misshomx kienu fuqha u misshom kienu aktar attenti. Imma possibbli, persuni li qed jiġġieldu kawża tant nobbli, li qed jitkellmu għas-salvazzjoni tal-art ta' pajjiżna u li dejjem ta' dejjem kienu konsistenti, ħaqqhom dak it-trattament? Hawn min bena villaġġi sħaħ kontra l-liġi, hawn min ma jħallasx it-taxxa, hawn min għamel muntanja terrapien fid-Dwejra u tħallew jagħmlu li jridu...ma' erba' attivisti żgħażagħ bit-tnabar ridna nuru s-saħħa? Ma' nies li dejjem tkellmu għaż-żgħir u għal artna? Il-Moviment Graffitti dejjem kien konsistenti fil-ġlieda tiegħu għall- ugwaljanza, għaż-żgħir, għall-ħaddiem u d-drittijiet tiegħu, u dejjem kien wieħed mill-aktar vuċijiet b'saħħithom għall-ambjent. U iva, wieħed mill-aktar vuċijiet b'saħħithom tax- xellug, fi żmien meta l-ideoloġija politika m'għadhiex moda u minflok il-moda saret kif erba' min- nies se jħaxxnu buthom l-aktar u ma' min mill-partiti "se nakkwista". Ma jfissirx li naqblu ma' kull pożizzjoni tal-Graffitti. Iżda żgur li se niddefendu d-dritt li dawn jipprotestaw u jsemmgħu leħinhom u jagħmlu iktar minn hekk, jekk ħadd ma jisma' lilhom. Wara kollox il-punt tagħhom kien u għadu jagħmel ħafna sens. Jekk il-politika dwar il-pompi tal-petrol se tinbidel, għaliex ma nistennewx qabel isiru kunsiderazzjonijiet ta' applikazzjonijiet li hemm quddiem il-PA. Jew se nagħtu ħafna mill-permessi u biss wara li nagħmlu dan inbiddlu l-politika? Jekk hu hekk, allura ma jkun xejn għajr daħk fil-wiċċ u insult għall-intelliġenza tal-poplu. Din il-gazzetta tibqa' konsistenti fuq din il- kwistjoni. Aħna ma niktbux editorjali ngħidu li l-istrajk jew il-protesti 'jweġġgħu' lill-pajjiż meta jaqblilna, imbagħad inbiddlu d-diska meta jitla' l-Gvern li forsi jassoċjawna aktar miegħu. Din il-gazzetta temmen illi l-protesta, strajk jew azzjoni taħt kull forma, basta mhux vjolenti, hija dritt sagrosant u għodda demokratika f 'idejn il-poplu. U hekk eżatt tibqa' u hekk eżatt nibqgħu nemmnu, ikun min ikun hemm fil-Gvern. Kellu biex ikun verament diżappuntat il-Prim Ministru din il-ġimgħa. Editur: Albert Gauci Cunningham