Issue link: https://maltatoday.uberflip.com/i/1110340
M eta wieħed isemmi ambjent, l-ewwel li tiġi f 'moħħu huwa n-natura, il-kampanja. Imma l-ambjent huwa wkoll dak kollu li bħala soċjetà jaffettwana mill-qrib. L-ambjent kulturali, dak edukattiv, l-ambjent kreattiv. Anki li jkollok pajjiż b'demokrazija b'saħħitha huwa ambjent li huwa dehen għas-soċjetà. Din il-ġimgħa rajna kif l-ambjent demokratiku b'saħħtu li dan il-Gvern ġab 'il quddiem, kien mhedded mill-Partit Nazzjonalista. Il-Partit Nazzjonalista ried iwaqqaf elezzjoni fi 23 lokalità, kollha fin-Nofsinhar ta' Malta. Ried jitratta r-residenti tan- naħa ta' isfel ta' pajjiżna, billi jnaqqsilhom dritt demokratiku – dak tad-dritt bażiku li jivvutaw. Ir-risposta tal-poplu għandha tkun ċara. Il-poplu se jwieġeb lura billi jkun hemm vot b'saħħtu fil-25 ta' Mejju li ġej favur il-kandidati kollha tal- Partit Laburista. Aħna rridu nixprunaw 'il quddiem il-bidliet fil-lokalitajiet tagħna, l-istess bidliet li qed nagħmlu fuq bażi nazzjonali. X'inhi l-għażla li għandu l-poplu quddiemu? Għażla bejn min lanqas kapaċi jorganizza Partit, aħseb u ara kemm huwa kapaċi jmexxi pajjiż u Partit li qed jikseb ir-riżultati kemm fuq bażi Nazzjonali imma wkoll fuq bażi lokali. Nieħu gost nara rapporti li huma mfassla minn entitajiet barranin li ma jħarsux minn lenti partiġġjana imma jħarsu lejn l-istampa kif hi fil-verità. Il-Ġimgħa kien ippubblikat rapport imsejjaħ Justice Scoreboard. Dan juri kif il- pubbliku u l-kumpaniji Maltin jemmnu li l-indipendenza tal- ġudikatura ssaħħet. Dan huwa s-sodisfazzjon tagħna. Li naraw li dak li b'għaqal qed naħdmu fuqu qed jagħti r-riżultati. Ir-rapport li semmejt huwa tal-Kummissjoni Ewropea dwar l-effiċjenza tal-qasam tal-ġustizzja fil-pajjiżi kollha tal-Unjoni Ewropea. Fih naqraw u ninnutaw li huwa pożittiv immens li l-pubbliku Malti saħħaħ konsiderevolment il-fehma tiegħu li l-ġudikatura hija tassew indipendenti din is-sena mqabbel mas-snin ta' qabel. Anke l-kumpaniji f 'Malta din is-sena saħħew il-fehma tagħhom li l-ġudikatura hija indipendenti wara li ġie rreġistrat tnaqqis fis-sena ta' qabel. Il-Justice Scoreboard ta' din is-sena jħares ukoll lejn l-effiċjenza tas-sistema tal- ġustizzja rreġistrata matul is-sena 2017. Waqt li fadal sfidi li jridu jingħelbu, jirriżulta li għal darb'oħra l-ħidma biex tiżdied l-effiċjenza fil-qrati tagħna kompliet tagħti l-frott u pajjiżna qiegħed fit-triq it-tajba anke f 'dan is-settur. Fil-fatt, il-qrati tagħna komplew inaqqsu ż-żmien meħtieġ biex jinqatgħu kawżi ċivili, kummerċjali, amministrattivi u oħrajn fejn jispikka t-titjib b'saħħtu ħafna rreġistrat bejn l-2010 u l-2017. L-isfida hija li dan it-titjib ikun rifless ukoll fil-Qrati tal-Appell Ċivili u kien għalhekk li l-Gvern waqqaf sede oħra tal-Qorti tal-Appell (Sede Superjuri) iktar kmieni f 'din il-leġiżlatura biex jiżdied l-ammont ta' kawżi deċiżi f 'dan ir-rigward. Huwa pożittiv ukoll li n-numru ta' kawżi pendenti baqa' stabbli fil-livelli tajbin tas-sentejn ta' qabel, tant li pajjiżna għandu t-tmien l-inqas ammont ta' kawżi pendenti fil-kamp ċivili, kummerċjali u amministrattivi fost it-28 stat tal-Unjoni Ewropea. Dan fl-istess waqt li pajjiżna għandu r-raba' l-inqas numru ta' ġudikanti ras għal ras fi ħdan l-Unjoni Ewropea. Pajjiżna jirreġistra riżultati tajbin ukoll fil-parteċipazzjoni tal-ġudikanti fit-taħrig (ir-raba' post), fl-ammont ta' avukati ras imb ras (il-ħames post) u f 'oqsma varji tal-informatika. Il-Gvern huwa kommess li jkompli jtejjeb il-qasam tal-ġustizzja, li huwa pilastru ewlieni tad-demokrazija ta' pajjiżna. ••• Qed nieħdu ħsieb l-ambjent ta' madwarna. Mhux biżżejjed li l-poplu qed jibbenifika minn kull settur. Irriduh jgħix f 'ambjent xieraq ukoll. Qabel nispjega x'qed nagħmlu, tajjeb li ngħid li trid tidħol aktar kuxjenza dwar iż-żamma tal-ambjent. Għalfejn qed ngħid dan? Dil-ġimgħa rajna kif id- Diviżjoni għat-Tindif u Manutenzjoni ġabret aktar minn 16,000 tunnellata ta' skart mormi b'mod illegali fl-2018. Mhux tunellata jew tnejn! Waqt żjara fil-parti magħrufa bħala Tal-Papa f 'Birżebbuġa, fejn qiegħed isir xogħol estensiv mid-diviżjoni, rajna li din is-sena diġà nġabru iktar minn 128 tunnellata ta' skart illegali minn din il-parti. Din id-diviżjoni tagħmel l-almu tagħha kuljum biex tiżgura li pajjiżna jinżamm nadif u miżmum sew, u aħna impenjati biex inkomplu ntejbu l-lokalitajiet tagħna għall-ġid tal-komunità. Permezz ta' dan kollu, qegħdin niżguraw spazji aktar nodfa u siguri għall- familji tagħna, biex jitgawdew u jiġu apprezzati. Dan il-lokal fin-Nofsinhar ta' Malta, huwa wieħed mill-ħafna lokalitajiet li qegħdin jitnaddfu minn din id-diviżjoni. Jekk tieħu total tara wkoll li din is-sena biss, sal-aħħar ta' Marzu nġabru 'l fuq minn 4,500 tunnellata ta' skart illegali. Dan huwa abbuż mill- ambjent tagħna. Speċjalment meta wieħed iqis li hemm entitajiet li jgħinuk teħles mill- iskart tiegħek u hemm ukoll postijiet legali fejn wieħed jista' jarmi dan l-iskart. Tajjeb li wieħed jgħid li d-Diviżjoni għat-Tindif u Manutenzjoni hija kommessa li tkompli toffri dan ix-xogħol f 'aktar lokalitajiet li qegħdin isofru minn abbuż ta' rimi ta' skart illegali. Din id-diviżjoni qiegħda fi qbil mal-LESA biex jiġu infurzati, u għalhekk imnaqqsa, dawn l-illegalitajiet f 'diversi postijiet madwar Malta. ••• Waqt il-festeġġjamenti ta' San Girgor fiż-Żejtun, niedejt it-12-il edizzjoni konsekuttiva ta' 'Għanafest'. Din hija ċelebrazzjoni tal-wirt lokali u Mediterranju. Il-festival iservi ta' pjattaforma ewlenija għall- mużika folkloristika li jgħin mużiċisti u kantanti Maltin jesponu ruħhom quddiem udjenzi ikbar. Huwa permezz ta' inizjattivi bħal din li nkunu nistgħu nkomplu nippromovu t-talent lokali, filwaqt li niżguraw li s-settur artistiku u kulturali huwa aċċessibbli għal kulħadd. Fil-fatt il-mira tagħna hija li nkomplu nsaħħu dan is-settur, li għandu parti importanti fil-prodott lokali tagħna bħala soċjetà, u dan huwa possibbli permezz ta' avvenimenti ta' din is-sura. Din is-sena, l-'Għanafest' li se jittella' fil-Ġonna tal-Argotti bejn il-21 u t-22 ta' Ġunju, għandu żwieġ li jgħaqqad elementi tradizzjonali, moderni u kontemporanji flimkien sabiex jinħoloq dan il-festival uniku. Interessanti li din is-sena se jkun hemm ukoll sessjonijiet interattivi ta' tisjir, li matulhom kokijiet se juru kif għandu jissajjar u jiġi ppreżentat il-ħut Malti u nisa ta' sajjieda Xlukkajri se jsajru l-aljotta tradizzjonali Maltija u jdewquha lill-pubbliku. It-tfal se jkollhom ukoll l-irkejjen tagħhom b'logħob tradizzjonali, apparti rkejjen litterarji b'djalett u wkoll wirjiet artiġjanali tipiċi Maltin. Dan kollu huwa parti mill-istrateġija tal-Ministeru fejn tidħol il-kultura. Dik li tressaq dejjem aktar il-kultura lejn il-poplu, tippriserva t-tradizzjonijiet kulturali u wkoll tara li l-kultura tkun aċċessibbli għal kulħadd. Owen Bonnici huwa Ministru ghall-Ġustizzja, Kultura u Gvern Lokali Ambjent xieraq għal pajjiżna OWEN BONNICI Il-Partit Nazzjonalista ried iwaqqaf elezzjoni fi 23 lokalità, kollha fin-Nofsinhar ta' Malta Dil-ġimgħa rajna kif id- Diviżjoni għat-Tindif u Manutenzjoni ġabret aktar minn 16,000 tunnellata ta' skart mormi b'mod illegali fl-2018 illum | Il-Ħadd 28 ta' April 2019 18 VotEWROPA 2019