Issue link: https://maltatoday.uberflip.com/i/1066820
illum | Il-Ħadd 30 ta' Diċembru2018 Aħbarijiet 8 ....tkompli minn paġni 6 u 7 Marie Louise Coleiro Preca; fejn hi - bejn suċċessi u kritika Din kienet l-aħħar sena tal-Presidenza ta' Marie Louise Coleiro Preca. Kienet sena mimilja suċċessi imma kontroversja wkoll għall- President ta' Malta. Suċċessi: Coleiro Preca baqgħet popolari ma' firxa wiesgħa tal-poplu, ta' persuni ta' kull kulur politiku u kull sfond. Dan saħħaħ il-Presidenza tagħha li kienet ikkaratterizzata l-aktar minn stqarrijiet politiċi li kienu aktar frekwenti u xi ftit aktar voċiferi, anke jekk xi kultant sottili. Coleiro Preca kienet voċifera l-aktar dwar il-faqar, l-immigrazzjoni u anke l-kirjiet; tliet kwistjonijiet ewlenin li kienu diskussi fil-pajjiż matul l-2018. L-Istrina ta' din is-sena reġgħet kienet suċċess kbir b'rekord qawwi ta' €7 miljun miġbura. Kienet ġurnata illi fiha Coleiro Preca 'xegħlet'. Apparti l-ammont kbir ħafna miġbur għall-Malta Community Chest Fund, il-maratona kienet mimlija referenzi għall-bżonn li nagħtu 'rigal' lil Coleiro Preca fl-aħħar Strina tagħha. L-intervent ta' Edgar Preca qrib nofsilejl kien pjuttost indikattiv, hekk kif dan baqa' jgħid li l-poplu Malti u l-familja tagħha jinsabu warajha. Kontroversja: Imma s-sena ma kinitx ward u żahar biss. Il-President spiċċat fiċ-ċentru ta' kritika qawwija fuq il-firma tagħha tal-liġi tal-IVF minkejja li kien pjuttost ċar minn dak li qalet hi stess dakinhar li ffirmat il-liġi illi hi ma kinitx taqbel magħha. Din il-gazzetta stess ikkritikat din id-deċiżjoni, kif ma qabilx anqas il-President Emeritus Ugo Mifsud Bonnici li sostna illi kieku kien minflokha jippreferi jirreżenja minflok jiffirma. Din is-sena wkoll, il- President spiċċat f 'nofs kontroversja hekk kif kompla jinstema' l-każ kontra l-miljunarju Paul Bailey u l-avveniment 'Paqpaqli għall- Istrina' tal-2015 illi matulu karozza li kien qed isuq Bailey daħlet fl- udjenza u diversi persuni weġġgħu, uħud gravi. Fi Frar ta' din is- sena Coleiro Preca telgħet tixhed fil-każ. F'mument minnhom staqsiet; 'qed tissuġġerixxu li jien responsabbli?' qabel imbagħad kompliet tinsisti illi hi ma kellha ebda responsabbilità fl- organizzazzjoni ta' Paqpaqli għall-Istrina. Ġimgħa wara, il-President Emeritus George Abela xehed fl-istess każ u tefa' xi ftit ta' bomba fuq Coleiro Preca hekk kif qal illi fl-aħħar mill-aħħar ir- responsabilità ta' Paqpaqli għall-Istrina kienet taqa' fuqu bħala President. Naturalment dan tefa' xi ftit ta' dawl ikrah fuq Coleiro Preca hekk kif kien hemm min akkużaha li qed taħrab mir-responsabbilitajiet tagħha. B'hekk is-sena għal Coleiro Preca kellha żewġ skossi u kienet fil-mira ta' kritika. Minkejja dan iżda l-popolarità tagħha u l-prinċipji xellugin tagħha favur il-batut baqgħet iżżommha 'l fuq fil- klassifika tal-ILLUM. Ali Sadr Hasheminejad: Niżel – arrestat u l-Pilatus jingħalaq L-akbar tisbita din is- sena ħadha Ali Sadr Hasheminjad u l-bank li fetaħ f 'pajjiżna; il-Bank Pilatus. Għalkemm mhuwiex Malti, ħalla impatt fuq ix-xena politika lokali b'mod qawwi mhux biss għall-bank li fetaħ imma wkoll għall- allegazzjonijiet marbutin mal-istess bank, it-tip ta' klijenti u lil min stieden fit-tieġ tiegħu. L-Iranjan qed jiffaċċja sitt akkużi serji li jistgħu jarawh iqatta' l-bqija ta' ħajtu l-ħabs jekk jinstab ħati. Huwa kien arrestat fuq l-akkuża ta' konfoffa biex ikun frodat l-Istati Uniti, li għandha piena massima ta' ħames snin. L-akkuża dwar konfoffa li jikser l-IEEPA li għandha piena massima ta' 20 sena, dik ta' frodi tal- bank, b'piena massima ta' 30 sena, l-akkuża ta' konfoffa biex isir frodi tal-Bank, b'piena massima ta' 30 sena, dik ta' ħasil ta' flus b'piena massima ta' 20 sena u dik ta' konfoffa biex isir ħasil ta' flus, b'piena massima ta' 20 sena. Sussegwentement tneħħiet il-liċenzja tal- Bank Pilatus, fuq it-talba tal-Bank Ċentrali Ewropew (BĊE) u dan wara diversi kontroversji, fosthom dwar Egrant, kont li kellu Keith Schembri u kontijiet oħrajn tal-ogħla membri tal-Gvern tal-Ażerbajġan. Sal-aħħar darba li din il- gazzetta żaret il-Bank, dan kien imsakkar u mgħasses. Il-Bank Pilatus u Hasheminjed allura jistgħu jgħoddu l-2018 bħala waħda ħażina ħafna. Kummissarju tal-Pulizija – fejn kien – bejn intervent goff u qabdiet tad-droga Il-Kummissarju tal- Pulizija Lawrence Cutajar huwa wieħed minn dawk in-nies li l-ġudizzju dwaru huwa iswed jew abjad, jiġifieri estrem. Il-Kummissarju tal- Pulizija baqa' jkun ikkritikat l-aktar fuq il-każ tal-Panama u allura l-akkuża hija li ma ħax azzjoni f 'waqtha u li huwa pupu f 'idejn il- Prim Ministru. Fl-2018 dawn l-akkużi tpoġġew f 'kuntest akbar hekk kif lejn l-aħħar tas-sena, f 'serje ta' stejjer fuq The Times of Malta, irriżulta li investigazzjonijiet tal-Pulizija dwar 17 Black għaddejjin. Storja fuq il-gazzetta oħt Maltatoday, turi kif anke l-allegazzjonijiet fil-każ ta' Chris Cardona u l-allegat preżenza tiegħu ma' akkużat bil-qtil ta' Daphne Caruana Galizia, f 'bar fis-Siġġiewi qed ikunu investigati. Fil-każ tal-qtil ta' Daphne Caruana Galizia l-affarijiet mexjin ħafna iktar bil-mod milli wieħed seta' jaħseb, iżda xorta jibqa' fatt li fl- 2017 saru l-arresti ta' tlieta minn nies. Apparti dawn l-akkużi politiċi iżda, Cutajar kien ikkritikat ukoll fl-2018 għall-mod kif il-Pulizija intervjenew fil-każ ta' protesta fil-binja tal-Awtorità tal-Ippjanar. Dakinhar, fuq filmat li dar sew fuq il-midja soċjali, il-Pulizija dehru jkaxkru dawk li kienu qed jipprotestaw 'il barra mill-binja. Naturalment din ma kinitx xena li għamlet wisq ġid għall-Korp, tant li l-PM Muscat qal lill-midja illi għamel kuntatt mal- Korp tal-Pulizija u wera ruħu ddiżappuntat bil- kbir għall-mod kif kienet indirizzata s-sitwazzjoni. Il-protesta kienet kontra applikazzjoni biex tinbena pompa tal-petrol oħra u minħabba n-nuqqas ta' azzjoni biex tinbidel il- politika tal-pompi tal- petrol. Matul l-2018 iżda, il- Pulizija ffaċċjaw wieħed mill-akbar attakki fuq membru tagħhom stess. L-attakk fuq il-Kuntistabbli Simon Schembri, minkejja li kien episodju tat-tkexkix, għaqqad lil ħafna mill- poplu wara l-Korp bl-għajta 'Blue Lives Matter'. Dan kien mument importanti mhux biss għall-Kummissarju imma għall-Korp tal- Pulizija kollu, hekk kif eluf ingħaqdu l-Belt biex juru solidarjetà mal-Pulzija. Il-Pulizija iżda għamlu suċċess kbir ukoll fil-qbid tad-drogi, bl-ammont maqbud jirdoppja fl-ewwel disa' xhur tas-sena. Dan ifisser li l-ġudizzju dwar Cutajar jibqa' fil-bilanċ. Minn naħa, l-immaġini tiegħu u l-abilità li jikkomunika mal- midja mhumiex tajbin. Saru mistoqsijiet dwar kemm kien spedit fl-investigazzjoni fuq diversi stejjer politiċi kif ukoll dik l-imbierek ikla fniek waqt li kienu qed ikunu żvelati allegazzjonijiet xokkanti minn Daphne Caruana Galizia. Min-naħa l-oħra imma hemm is- suċċessi tal-Korp f 'qabdiet tad-droga u l-popolarità tiegħu fost il-membri tal- Korp. Sandro Chetcuti - niżel – ħafna qed iwaħħlu fih għat- tnaqqir tal-ambjent Chetcuti sar ftit ta' figura ta' antipatija għal ħafna filwaqt li huwa figura pożittiva għal ħafna oħrajn. Chetcuti jibqa' 'lobbyist' eċċellenti u allura jimbotta l-aġenda tiegħu favur il- kuntratturi li jirrappreżenta b'effettività. Minkejja dan, għal ħafna oħrajn, Chetcuti sar is- simbolu tar-rgħiba ta' settur illi qed joħloq ħafna inkonvenjent, li qed ibiddel it-tessut tal-irħula tagħna u li qed jiekol mill-art prezzjuża ta' artna. Apparti minn hekk is-settur, li joħloq ħafna impjiegi, qed iħaddem ħafna barranin u allura mhux darba jkunu akkużati li qed iħaddmu n-nies b'pagi baxxi. Bosta jarawh bħala persuna li huwa 'wisq' qrib il-poter u stqarrijiet fl-2018 bħal 'Malta għandha ssir Monako oħra' u 'l-barranin jaħdmu b'mentalità ta' 50 sena ilu' attiraw kummenti ta' kritika ħarxa lejn Chetcuti. Kull darba li jgħid xi ħaġa naqra goffa tara serbut