Issue link: https://maltatoday.uberflip.com/i/441182
4 illum | Il-Ħadd 04 ta' Jannar 2015 LISTEJJER ta' kronaka jġibu magħhom statistika u hija ħasra għax sfortunatament il-vittmi ħafna drabi jispiċċaw numri. Matul l-2014 fil- fatt saru inqas imwiet u qtil u inqas każi ta' serq, għalkemm din hija minn statistika li tinżamm mill- gazzetta u mhux statistika uffiċjali. Fl-2014 spikkaw għal darb'oħra qtil ta' persuni li l-Pulizija temmen li saru bi tpattija bħalma kien hemm fis-sena ta' qabel. Omiċidji Fil-fatt mill-informazzjoni li għandna matul it-12-il xahar tas-sena l-oħra seħħew sitt każi ta' qtil li erba' minnhom għadhom mhux solvuti. Matul is-sena 2013 kienu saru tmin omiċidji. • L-ewwel omiċidju tal- 2014 seħħ fl-4 ta' Frar fejn inqatel Ġużi Galea ta' 58 sena mill-Marsa magħruf bħala "l-Ġilda". Il-qtil kien wieħed premeditat u ppjanat li seħħ quddiem ir-residenza tiegħu għall- ħabta tal-5am fi Triq ix-Xemxija fil-Marsa, li tinsab fil-Qasam tad-Djar. Galea kien għadu kemm daħal fil-karozza tiegħu Kia Sorrento. Huwa nqatel meta ġew sparati xejn inqas minn 17-il tir, x'aktarx minn 'assault rifle' tal-marka AK minn xi ħadd f 'karozza li waqfet warajh. Huwa ntlaqat b'ħames tiri fuq wara ta' ġismu. S'issa l-Pulizija għadhom ma arrestaw lil ħadd dwar dan il-qtil. • It-tieni qtil seħħ fil-11 ta' Frar bil-vittma jkun Kristic Dragoljub ta' 27 sena mis-Serbja. Il-każ seħħ fi Triq il-Merluzz fil-Qawra bil-vittma jinqatel b'daqqa ta' mus f 'qalbu. Dwar dan il- qtil il-Pulizija arrestaw lil Emil Atanasov, ta' 27 sena mill-Bulgarija. Kien għall-ħabta tas-2.15am meta qam argument fl- appartament bil-Bulgaru jaqla' daqqa fuq imnieħru. Ir-reazzjoni kienet waħda vjolenti bil-Bulgaru, li jgħix fl-appartament, ġab mus u ta daqqa waħda lil Kristic Dragoljub li laqtu eżatt f 'qalbu. • Qtil ieħor li wkoll għadu mhux solvut seħħ l-għada, fit-12 ta' Frar, fejn Pietru Cassar, għażeb ta' 67 sena miż-Żejtun magħruf bħala "Pietru l-Ħaqqa", inqatel b'żewġ tiri ta' arma tan-nar, x'aktarx pistola semi-awtomatika kalibru 9mm. "Il-Ħaqqa" nqatel għall-ħabta tas-2.10pm meta kien fil-garaxx tiegħu fi Triq Santa Marija fiż-Żejtun. Persuna jew persuni waqfu quddiem il-garaxx fejn mhux qed ikun eskluż li għamlu użu minn mutur minħabba li t-triq hija dejqa u ma kinux se jsibu ostaklu biex jaħarbu minn fuq il-post. Kif waqfu quddiem il-garaxx fejn kien hemm Cassar, ġew sparati tlieta jew erba' tiri fid-direzzjoni tal-anzjan. Huwa ntlaqat minn żewġ tiri, wieħed f 'sidru u l-ieħor f 'għonqu. Dan il-każ ukoll għadu mhux solvut. • Każ li seħħ fid-19 ta' Marzu huwa dak tat-tfajla Maria Lisa Zahra ta' 15-il sena mis-Swieqi fejn Erin Tanti ta' 23 sena mill-Belt jinsab akkużat bil-qtil tagħha meta assista lil Zahra biex taqbeż minn fuq fuq l-irdumijiet ta' Ħad-Dingli. • Il-ħames qtil seħħ fl-1 ta' Ġunju meta Darren Degabriele ta' 35 sena minn Ħal Għaxaq inqatel fi Triq iż-Żejtun limiti ta' Marsaxlokk. Degabriele kien qed isuq Mitsubishi Pajero meta splodiet bomba li tpoġġiet taħt il-karozza. Qtil ieħor li għadu mhux solvut. • L-aħħar qtil għas-sena 2014 huwa dak ta' Jonathan Pace ta' 31 sena mill-Fgura li kien sid il-kumpanija 'Tyson Butcher'. Huwa safa ferut b'diversi tiri sparati minn sub-machine gun fi Triq Mahatma Ghandi fil- Fgura għall-ħabta tad- 9.10pm. Huwa miet ftit tal-ħin wara li ddaħħal l-isptar f 'qagħda kritika. Il-qtil ta' Pace huwa simili ħafna bħal dak ta' Joseph Galea, magħruf bħala "l-Ġilda". Pace, kien akkużat fil-Qorti bl-attentat ta' qtil ta' Vince Muscat, magħruf bħala "il-Koħħu", li seħħ fit-8 ta' April 2014 fi Triq Bordin fl-Imsida. Pace kien spara fid-direzzjoni ta' Muscat meta dan kien fil-karozza. Minkejja li kien ferut, Muscat saq lejn l-Għassa tal-Pulizija tal- Imsida. Pace kien ingħata l-ħelsien mill-arrest dwar dan l-attentat 13-il ġurnata qabel ma nqatel. Inċidenti fatali tat-traffiku Matul l-2014 seħħew 11-il każ ta' inċidenti fatali tat- traffiku li minnhom sitt vittmi kienu mixjin fit-triq jew kienu fit-triq u mhux f 'karozza. Fis-sena 2013 it-total ta' vittmi fit-toroq Maltin u Għawdxin kien ta' 19. • L-ewwel inċident fatali seħħ fl-10 ta' Jannar fil-5.12am meta Clive Brincat ta' 32 sena mill- Belt, li kien joqgħod il- Furjana u li kien magħruf bħala "il-Ġojja", kien wieqaf bil-mutur tiegħu, Piaggio Runner, fi Triq il- Konvoj ta' Santa Maria fl- Imqabba. Kif kien għadu fuq il-mutur minn warajh ġiet karozza Peugeot 206 misjuqa minn Jean Claude Mangion ta' 19-il sena mill-Qrendi u laqtitu b'konsegwenza li Brincat safa mtajjar u miet fuq il-post. • Fil-15 ta' Jannar mietet Karen Cutajar ta' 38 sena minn San Pawl il-Baħar. Cutajar kienet qed issuq karozza Fiat 600 fi Triq is-Salini limiti tan-Naxxar meta għall- ħabta tas-2.35pm ħabtet head-on ma' trakk misjuq minn Matthew Mangion ta' 28 sena minn Naxxar. • It-tielet inċident fatali li seħħ fl-24 ta' Jannar kien xi ftit stramb. Philip Scott Attard ta' 44 sena, Ingliż, residenti Ħal Għaxaq kien miexi fi Triq Ħal Farruġ, f 'Ħal Farruġ, meta għall-ħabta tas-6.35am intlaqat minn karozza Opel Corsa u kif kien fl-art għaddiet karozza Ford Escort minn fuqu. • Ingliż ieħor, John Darren Casey Ingliż ta' 33 sena li kien joqgħod San Pawl il-Baħar, miet fil-5 ta' Marzu fi Triq Burmarrad limiti tal-Mosta għall- ħabta tas-7.15am Casey tilef il-kontroll tal- karozza VW Polo u baqa' dieħel f 'Vauxhall Brava misjuqa minn John Paul Azzopardi ta' 28 sena minn Ħaż-Żebbuġ. • Fl-24 ta' Marzu, Somalu ta' 19-il sena, Ibrahim Ismail Yasin għall-ħabta tas-2.30pm kien qed jaqsam Triq Aldo Moro fil-Marsa meta ntlaqat minn karozza Fiat Fiorentino misjuq minn Warren Frendo ta' 23 sena minn San Pawl il- Baħar. • Is-sitt inċident fatali seħħ fl-24 ta' Mejju fl-10.40am meta Maria McKay ta' 75 sena mill-Imsida ntlaqtet minn bowser meta kienet qed taqsam minn fuq it-traffic lights fi Triq il-Wied fl-Imsida. Is-sewwieq tal-bowser ma ndunax li kien laqat lill-anzjana u baqa' sejjer. Il-bowser u s-sewwieq instabu ftit tal-ħin wara fil-Gżira. • Fis-6 ta' Ġunju fis-6.05am miet George Scerri ta' 39 sena minn San Ġiljan meta tilef il-kontroll tal-karozza Mitsubishi Shogun u baqa' dieħel f 'ħajt fi Triq Garibaldi fil-Marsa. • Anzjana ta' 68 sena minn Ħal Qormi ntalqtet minn karozza misjuqa minn raġel ta' 31 sena mill- Mosta fil-5 ta' Settembru fis-6.30pm fi Triq l-Imdina. Il-mara mietet l-għada fl-Isptar Mater Dei. • Fl-20 ta' Ottubru Ġian Patist Azzopardi ta' 66 sena mill-Imtarfa kien fil-post il-ħażin fil- ħin ħażin meta għall- ħabta tal-10.20am kien bilqiegħda fuq stejġ tal-linja fi Triq l-Imtarfa, fl-Imtarfa, flimkien ma' ħatnu, Joe Vella ta' 61 sena. Dak il-ħin karozza misjuqa minn Rowen Caruana ta' 17-il sena baqgħet dieħla fl-istejġ fejn kienu bilqiegħda u Azzopardi nqatel fuq il- post. • Fl-14 ta' Settembru Charles Borg ta' 43 sena minn San Ġwann kien iddikjarat mejjet kawża tal-ġrieħi li sofra f 'inċident li seħħ fit-23 ta' Ottubru, 2013 fi Triq Garibaldi fil-Marsa meta Borg tilef il-kontroll tat- trailer li kien qed isuq u nqaleb. • L-aħħar inċident fatali għas-sena 2014 seħħ fid-19 ta' Diċembru meta Maria Degabriele ta' 76 sena minn Ħ'Attard kienet miexja fi Triq Victor Vassallo f 'Attard u għall-ħabta tat-8.30pm ittajret minn karozza Toyota Vitz misjuqa minn Robert Micallef ta' 28 sena minn B'Kara. Overdose ta' droga Is-sena 2014 rat każ wieħed ta' dak li kien suspettat bħala overdose fatali, l-istess bħal tas-sena ta' qabel. John Pisani jpisani@mediatoday.com.mt Ġrajjiet ta' kronaka fl-2014 Kompla l-qtil li x'aktarx Fl-2014, bħas-sena ta' qabel, spikkaw l-omiċidji li l-Pulizija temmen li saru bi tpattija Kien hemm biss każ wieħed ta' dak li kien suspettat bħala overdose fatali